विराटनगर, असोज १४
प्रदेश एकका मुख्यमन्त्री शेरधन राईले कृषिलाई पहिलो प्राथमिकतामा राखेर प्रदेश सरकार अघि बढिरहेको बताएका छन् । नेपाल उद्योग वाणिज्य महासंघ प्रदेश १ ले आइतबार विराटनगरमा आयोजना गरेको कृषिक्षेत्रको विकासमा सरकारी र निजीक्षेत्रको भुमिका बिषयक अन्तरक्रिया कार्यक्रमलाई सम्बोधन गदै मुख्यमन्त्री राईले यस्तो बताएका हुन् ।
मुख्यमन्त्री राईले प्रदेश १ का पहाडी तथा तराईका जिल्लाहरु जडिबुटी,तरकारी र अन्न उत्पादन भण्डारकोरुपमा रहेको बताउदै प्रदेशको उर्बर माटोको सदुपयोगबाट यो प्रदेश आत्मनिर्भर हुनसक्ने आधार रहेको बताए ।
उनले कृषि क्षेत्रको विकासका निम्ति प्रदेश सरकारले निति तथा कार्यक्रम मार्फत सम्बोधन गरिसकेको बताउदै कृषिक्षेत्रलाई उद्योगकोरुपमा बिकासगर्ने तथा रोजगारी सृजनागर्ने बिषयमा समेत प्रदेश सरकारको ध्यान केन्द्रीत रहेको बताए ।
मुख्यमन्त्री राईले भर्खरै विराटनगरमा कृषि निर्देशनालय स्थापना गरिएको स्मरण गराउदै प्रदेशका अन्य जिल्लामा समेत कृषि कार्यालयहरु स्थापना गरेर बजेट परिचालन गरिने जानकारी दिए । कार्यक्रममा १४ जिल्लाका उद्योग वाणिज्य महासंघका पदाधिकारी तथा निजी कृषि फर्म सञ्चालकहरुको सहभागिता छ ।
