१२ फागुन, एजेन्सी ।

अन्तर्राष्ट्रिय उडान भर्ने राष्ट्रिय ध्वजावाहक नेपाल वायुसेवा निगमका दुइवटै ‘न्यारो बडी’ जहाज विदेशमा थन्किएका छन् । निगमसँग रहेको १ सय ५७ सिट क्षमतायुक्त दुई थान न्यारो बडी जहाजमध्ये एउटा साउदी अरबको दम्माम र अर्को चीनमा ग्राउन्डेड भएका हुन् ।

जसकारण न्यारोबडीले सेवा दिइरहेका दिल्ली, मुम्बई, बेंग्लोर, थाइल्यान्ड, हङकङ, मलेसियालगायतको उडान प्रभावित भएको छ । युरोपेली जहाज निर्माता कम्पनी एयरबसमा निर्मित ‘ए३२०–२००’ सिरिजको ‘९एन–एकेएक्स’ दर्ता नम्बरको निगमको जहाज आइतबार दम्माबाट काठमाडौं उड्ने क्रममा प्राविधिक समस्या देखिएपछि उतै ‘ग्राउन्डेड’ भएको हो ।

‘जहाज उड्नुअघि नियमित चेक गर्ने क्रममा नोज ल्यान्डिङ गियरमा समस्या देखिएपछि ग्राउन्डेड गरेका छौं,’ निगमका प्रवक्ता रमेश पौडेलले भने, ‘जहाज मर्मत गर्न साउदी एयरलाइन्ससँग कुराकानी भइरहेको छ ।’

त्यसैगरी नियमित मर्मत (सी–चेक) का लागि चीन गएको सोही सिरिजको अर्को जहाज आइतबार नै काठमाडौं आउने तालिका भए पनि उतै रोकिएको पौडेलले । दर्ता नम्बर ‘९एन–एकेडब्लू’ जहाजको मर्मत खर्च तोकिएको समयमा नभएपछि जहाज उड्न नपाएको उनले बताए ।

‘हाम्रो जहाज मर्मत गर्ने कम्पनी चाइना साउदर्न एयरलाइन्सलाई मर्मत शुल्क भुक्तानीमा केही समय लागेकाले जहाज आउन पाएन,’ प्रवक्ता पौडेलले भने, ‘सम्भवतः अब दुवै जहाज आज सोमबारसम्म काठमाडौं आइपुग्ने छन् ।’

दुइटै न्यारो बडीको उडान रोकिँदा साउदीबाट आउन लागेका यात्रु र काठमाडौंबाट यूएईको दुबई जानुपर्ने उडान रोकिएको पौडेलले बताए । उनका अनुसार साउदीमा रोकिएका केही यात्रुलाई स्थानीय होटलमा बास बस्ने व्यवस्था मिलाइएको छ भने केहीलाई अन्य एयरलाइन्सका टिकट काटेर काठमाडौं ल्याउने व्यवस्था भइरहेको छ ।

‘आइतबार र सोमबार दुबई जानुपर्ने यात्रुलाई भने सोमबार वाइड बडी जहाजबाट एउटै उडान मार्फत पठाउँछौं,’ उनले भने, ‘सकेसम्म व्यवस्थापन गरिरहेका छौं । अन्य गन्तव्यका उडानमा भने प्रभाव परेको छैन ।’

निगमसँग अन्तर्राष्ट्रिय उडान गर्न दुइटा न्यारो बडी र २ सय ७४ सिट क्षमतायुक्त दुई थान वाइड बडी गरी चार थान जहाज छन् । नियमित मर्मत अभावमा निगमका जहाज ग्राउन्डेड भइरहने पुरानै रोग हो ।

अन्तर्राष्ट्रिय उडानका लागि दुई ठूला र दुई साना जहाजबाट सेवा दिइरहेको निगमले मर्मतमा ध्यान नदिँदा जहाज पटक–पटक ग्राउन्डेड भएर सेवा र आम्दानीमा असर परिरहेको छ । यता तुम्लिङटार, दाङ, रेसुंगा, रुकुम पश्चिमलगायत दुर्गमका जनतालाई सेवा दिने गरी आन्तरिक उडान गर्दै आएका निगमका दुईवटै ट्विनअटर जहाज पनि ग्राउन्डेड छन् ।

जसकारण आन्तरिक उडान ठप्प छ । समयमै इन्जिन व्यवस्थापन गर्न नसक्दा ट्विनअटर ९एन–एबिटी २३ जेठदेखि र ९एन–एबियू ७ पुसदेखि ग्राउन्डेड भएर बसेका छन् । इन्जिन फेरेर दुवै जहाजलाई नियमित उडानमा फर्काउन निगम व्यवस्थापनले पनि चासो दिएको छैन ।