११ चैत , एजेन्सी ।
बंगलादेशका पूर्व क्रिकेट कप्तान तामिम इकबाल ढाका प्रिमियर डिभिजन क्रिकेट लिगको खेलका दौरान गम्भीर हृदयघातका शिकार भएका छन्। उनलाई तुरुन्तै राजधानी ढाकाको बाहिरी क्षेत्र सावरस्थित एक अस्पतालमा भर्ना गरिएको छ।
स्थानीय सञ्चारमाध्यमहरूका अनुसार उनको अवस्था ‘गम्भीर’ रहेको छ र उनलाई जीवनरक्षक प्रणालीमा राखिएको छ। बंगलादेश क्रिकेट बोर्डका प्रमुख चिकित्सक डा. देवाशीष चौधरीका अनुसार, “तामिमलाई प्रारम्भिक परीक्षणका लागि नजिकको अस्पताल पु¥याइएको थियो, जहाँ उनलाई सानो स्तरको हृदयसम्बन्धी समस्या रहेको आशंका गरियो। उनलाई ढाका लैजाने तयारी भइरहेकै बेला हेलिप्याडमा जाने क्रममा अचानक गम्भीर छाती दुखाइ भयो, जसका कारण उनलाई पुनः अस्पताल फर्काइयो। पछि मेडिकल रिपोर्टले पुष्टि ग¥यो कि यो ठूलो हृदयाघात थियो।“
डा. चौधरीले भनेका छन् , “यो हाम्रो लागि निकै कठिन समय हो। उनी अहिले चिकित्सकीय निगरानीमा छन् र मेडिकल टोली उनको स्वास्थ्य सुधारका लागि सक्दो प्रयास गरिरहेको छ।“
तामिम सावरस्थित बीकेएसपी मैदानमा मोहमडन स्पोर्टिङ क्लब र साइनपुकुर क्रिकेट क्लबबीच भइरहेको खेल खेलिरहेका थिए। खेलकै क्रममा उनले छाती दुखाइ महसुस गरेपछि तत्काल उनलाई अस्पताल लगिएको थियो।
उनलाई हेलिकप्टरमार्फत ढाका लैजाने तयारी गरिएको थियो, तर स्थिति गम्भीर भएपछि उनलाई सावरकै फजलतुननेस्सा अस्पतालमै राखिएको छ । अन्तर्राष्ट्रिय क्रिकेटबाट जनवरीमा सन्यास लिएका तामिम अहिले स्थानीय क्रिकेट खेल्दै आएका छन् र बीच–बीचमा कमेन्ट्री पनि गर्दै आएका थिए।
अन्तर्राष्ट्रिय क्रिकेट करियरको कुरा गर्दा, तमिम इकबालले आफ्नो अन्तर्राष्ट्रिय करियर २००७ मा जिम्बाब्वे विरुद्धको हरारे एकदिवसीय खेलबाट सुरु गरेका थिए। ओपनरका रुपमा सन् २००७ को एकदिवसीय विश्वकपबाट भारतलाई बाहिर निकाल्न उनले महत्वपूर्ण भूमिका खेलेका थिए ।
आफ्नो करियरमा उनले बंगलादेशका लागि ७० टेस्ट, २४३ एकदिवसीय र ७८ टी–२० अन्तर्राष्ट्रियमा क्रमशः १०, १४ र एक शतक बनाएका छन्।
