२८ वैशाख,काठमाण्डौ।
प्रधानमन्त्री केपी शर्मा ओलीलाई राज्यका उच्च पदमा पुगेकाहरुलाई मिडियाहरुले तिमी भनेर सम्बोधन गरेको मन पर्दैन । उनी आफ्ना फोटाहरुमा सुन लगाइदिएर भाइरल बनाइदिनेप्रति आक्रोशित हुन्छन् ।
आफ्ना उखान टुक्कामिश्रित र घरघरमा ग्यासको पाइप जोडिदिने जस्ता भाषणहरु नपत्याइदिदा उनी झन रिसाउछन् । खेतका बीचमा किन भ्युटावर बनाएको भनेर प्रश्न सोध्नेलाई देखिसक्दैनन ।
पार्टीमा र सरकारमा पनि नयाँ पुस्तालाई अवसर दिनुपर्छ भन्नेलाई त झनै आफू थप २० वर्षसम्म नचटपटाउने उत्तर दिन्छन् । तर ओली स्वयं, अरुलाई भने तिमी त परको कुरा कसैको नाम लियो भने मुख कुल्ला गर्छु भन्छन् ।
फलानोको जस्तो मेरो पेट छ र ? घुस खानलाई भन्दै नामै किटेर कटाक्ष गर्छन् । पूर्वराजा वा राजसंस्था पक्षधरहरुलाई गाली गरेको सुन्दा गणतन्त्रका प्रधानमन्त्रीले नै बोलिरहेका हुन् त भनेर सोच्नु पर्नेअवस्था छ ।
उनीहरुलाई ओलीले भूत, प्रेत लगायतका शब्दहरु प्रयोग गरेर सम्बोधन गर्छन् । ओली सबैलाई शिष्टाचारको पाठ सिकाउछन् । तर आफू भने अशिष्टताको प्रतिक बनेका छन् । सबैलाई अर्ती उपदेश दिने प्रधानमन्त्रीको बोली, व्यवहार र आचरणले पटक पटक अशिष्ट प्रदर्शन गरेको छ ।
अहिले एउटा त्यस्तै फोटो भाइरल भएको जसले उनी कति अशिष्ट छन् भन्ने देखाएको छ । यो फोटो हो शनिबारको । बालुवाटारमा भएको विदुषी योगमाया हिमालयन आयुर्वेद विश्वविद्यालयका नवनियुक्त पदाधिकारीको पद तथा गोपनीयताको शपथग्रहण समारोह थियो ।
जहाँ प्रधानमन्त्री ओलीको उपस्थितिमा यी पदाधिकारीले सपथ लिइरहेका छन् । उनीहरु उभिएर सपथ लिइरहँदा प्रधानमन्त्री भने बीचमा कुर्सीमा बसिरहेका छन् । त्यो पनि असुहाउँदो आसनमा ।
प्रधानमन्त्रीको कार्यालयमा भएको औपचारिक कार्यक्रममा ओली भने घरमा भएको पारिवारिक गफमा बसेको जस्तो छेउ लागेर बसेको देखिएका छन् । उनको यो आसनले नै उनको शिष्टतालाई मापन गर्छ ।
यो तस्बिरमा विश्वविद्यालयका कुलपति प्रा.डा. रमेशकुमार ढुंगेलले रजिस्ट्रार डा. डम्बरध्वज चेम्जोङलाई शपथ खुवाउँदै छन् । शिष्टाचारका हिसाबले प्राज्ञिक व्यक्तित्वहरूको शपथमा उभिनुपर्ने प्रधानमन्त्री कुर्सीमा बसेका मात्रै छैनन्, आसन नै अस्वाभाविक छ ।
यतिमात्रै होइन सोही समारोहमा शिक्षामन्त्री रघुजी पन्तले विश्वविद्यालयका अध्यक्ष डा. अर्जुन कार्की र अध्यक्ष कार्कीले कुलपति ढुंगेललाई शपथ खुवाउँदा पनि प्रधानमन्त्री यस्तै आसनमा थिए । अन्न पानी कै शरीर हो, त्यसमाथि मिर्गौला प्रत्यारोपण गरेका प्रधानमन्त्रीको स्वास्थ्य पनि प्रतिकुल हुन् सक्छ ।
तर वालुवाटारका शपथ समारोहका तस्विरमा ओलीको बसाइको आसन हेर्दा उनी उभिनै नसकेर बसिरहे जस्तो चाँही देखिदैन । अरुलाई सपथ खुवाउँदा मात्रै होइन ओली आफैले प्रधानमन्त्रीको सपथ लिदा पनि यस्तै हर्कतले आलोचित भएका थिए ।
यसअघि तत्कालिन राष्ट्रपति विद्यादेवी भण्डारीले उनलाई सपथ ग्रहण गराउँदा ओलीले इश्वरको नाममा भन्दा त्यो पर्दैन भनेका थिए । त्यसपछि उनको त्यो भनाइ र पूर्व राष्ट्रपति भण्डारीको हासेको कुरा व्यापक आलोचित भएको थियो ।
प्रधानमन्त्री जस्तो पदमा, शपथ ग्रहण जस्तो औपचारिक कार्यक्रममा राष्ट्रपतिलाई नै सिकाउने, अराउने खालको हेपाईपूर्ण व्यवहार ओलीले प्रदर्शन गरेको भनेर व्यापक आलोचना भएको थियो । अहिले फेरि विश्वविद्यालयका पदाधिकारीहरुको सपथ ग्रहण कार्यक्रममा उनको आसन आलोचनाको केन्द्रमा परेको छ ।
उनको यो तस्विरले ४ दिन अघि मात्रै राष्ट्रपतिले भन्नु भयो भन्छ कि भने भन्छ ? भन्दै ओलीले मिडियालाई दिएको अर्ती,उपदेशको स्मरण गराएको छ ।
