१७ असार, काठमाडौं ।
नेपालमा पेट्रोलियम पदार्थको मूल्य भारी मात्राले बढेको छ । यसलाई इरान–इजरायल युद्धको असरका रुपमा हेरिएको छ । जुन २ सातापछि नेपालमा देखिएको हो ।
भारतबाट इन्धनको मूल्य बढेर आएपछि नेपाल आयल निगमले पेट्रोलियम पदार्थको मूल्य बढाएको हो । जसअनुसार पेट्रोल ५, डिजेल तथा मट्टितेल ४ र हवाई इन्धनको भाउ प्रतिलिटर ७ रूपैयाँले महँगो बनेको हो ।
एलपी ग्यासको मूल्य भने यथावत राखिएको छ । भाउ बढेपछि काठमाण्डौ, पोखरा र दिपायल क्षेत्रमा अब पेट्रोलको भाउ एक सय ६५ रुपैयाँ तथा डिजेल र मट्टीतेलको भाउ एक सय ४९ रुपैयाँ पुगेको छ ।
यस्तै सुर्खेत र दाङ क्षेत्रमा पेट्रोलको भाउ एक सय ६४ रुपैयाँ तथा डिजेल र मट्टीतेलको भाउ एक सय ४८ रुपैयाँ पुगेको छ । चारआली, विराटनगर, जनकपुर, अमलेखगञ्ज, भलवारी, नेपालगञ्ज, धनगढी र वीरगञ्ज क्षेत्रमा भने पेट्रोलको भाउ एक सय ६२ रुपैयाँ ५० पैसा तथा मट्टीतेल र डिजेलको भाउ एक सय ४६ रुपैयाँ ५० पैसा पुगेको छ ।
यसैगरी हवाइ इन्धनको भाउ पनि आन्तरिकतर्फ प्रतिलिटर सात रूपैयाँले तथा अन्तर्राष्ट्रियतर्फ प्रतिकिलोलिटर ५१ डलरले बढेको छ ।नयाँ मूल्यसूचीसँगै सार्वजनिक यातायात र हवाई भाडा पनि बढ्ने देखिएको हो ।
दुईसाता अघि इरान र इजरायलबीच युद्ध भएपछि त्यसको असर नेपाली बजारमा देखिएक हो । इन्डियल आयल कर्पोरेसनले आगामी १५ दिनका लागिका बढाएर मूल्य तोक्दा नेपालमा पनि भाउ बढाउनुपरेको नेपाल आयल निगमले जनाएको छ ।
उता विश्व बजारमा सुनको मूल्यमा पनि उच्च वृद्धि भएको छ । मंगलबारको कारोबारमा सुनको मूल्य १.३९ प्रतिशत अर्थात ४६ डलरले बढेको छ ।
यो वृद्धिसँगै सुनको कारोबार प्रतिऔंस ३ हजार ३२० डलरमा भईरहेको छ । डलर कमजोर बनेका कारण सुनको मूल्य बढेको हो । चाँदीको भाउ भने आज घटेको छ ।
चाँदी आज ०.०५ डलरले घट्दै प्रतिऔंस ३५.९५ डलरमा कारोबार भईरहेको छ । यस्तै आज डलरको भाउ पनि बढेको छ । नेपाल राष्ट्र बैंकले आजका लागि विदेशी मुद्राको विनिमयदर सार्वजनिक गरेको छ ।
जसअनुसार आज अमेरिकी डलरको भाउ बढेको छ । आज एक अमेरिकी डलरको खरिददर १३६.९२ रुपैयाँ र बिक्रीदर १३७.५२ रुपैयाँ कायम भएको छ ।
अघिल्लो दिन एक अमेरिकी डलरको खरिददर १३६.४७ रुपैयाँ र बिक्रीदर १३७.०७ रुपैयाँ कायम थियो । यस्तै आज एक यूरोको खरिददर १६०.५९ रुपैयाँ र बिक्रीदर १६१.२९ रुपैयाँ कायम छ । आज एक पाउण्डको खरिददर १८७.७२ रुपैयाँ र बिक्रीदर १८८.५५ रुपैयाँ कायम छ ।
१० जापानी येनको खरिददर ९.४९ रुपैयाँ र बिक्रीदर ९.५३ रुपैयाँ,एक युएई डिरामको खरिददर ३७.२८ रुपैयाँ र बिक्रीदर ३७.४४ रुपैयाँ, एक चिनियाँ युआनको खरिददर १९.११ रुपैयाँ र बिक्रीदर १९.१९ रुपैयाँ ,एक मलेसियन रिंगेटको खरिददर ३२.५१ रुपैयाँ र बिक्रीदर ३२.६५ रुपैयाँ, एक कतारी रियालको खरिददर ३७.५७ रुपैयाँ र बिक्रीदर ३७.७३ रुपैयाँ, १०० कोरियन वनको खरिददर १०.१० रुपैयाँ र बिक्रीदर १०.१४ रुपैयाँ र एक कुवेती डिनारको खरिददर ४४७.८५ रुपैयाँ र बिक्रीदर ४४९.८१ रुपैयाँ कायम भएको छ ।
