२४ असार , काठमाडौं ।
अखिल नेपाल फुटबल संघ (एन्फा) को पोल फेरि एक पटक नेपाली महिला फुटबल टिमका प्रमुख प्रशिक्षक प्याट्रिक डे वाइल्डले खोलिदिएका छन् ।
एन्फासँग चरम असन्तुष्ट देखिएका उनले अब एन्फा नसुध्रिएको खण्डमा नेपाल नफर्किने चेतावनीसमेत दिएका छन् । प्याट्रिकको प्रशिक्षणमा नेपालले हालै महिला एसिया कप छनोट प्रतियोगिता खेलेको थियो ।
प्रतियोगितामा उत्कृष्ट प्रदर्शन गर्दा गर्दै पनि उज्बेकिस्तानविरुद्धको निर्णायक खेलमा टाइब्रेकरमा चुक्दा नेपाल एसिया कपमा छनोट हुन सकेन । प्रतियोगितापश्चात् नेपाली टिम स्वदेश फर्किए पनि प्रशिक्षक प्याट्रिक भने फर्केका छैनन् ।
नेपाली मिडियासंगको एउटा अन्तरवार्ता उनले खुलेरै एन्फाको आलोचना गरेका छन् । एन्फाले नेपाली टिमलाई न्यूनतम पूर्वाधार र सुविधाहरूसमेत नदिएको उनको भनाइ छ ।
प्याट्रिकले भनेका छन्, ‘मैले एन्फासँग प्रशिक्षणका लागि चाहिने सामान्य किट्सहरू मागेँ, कुनै जवाफ नै आएन । होटलमै कहिलेकाहीँ आइससम्म हुन्नथ्यो । आइस पनि दिन नसक्ने हुन्छ त ? खेल भएको दिन, प्राविधिक प्रमुखले मलाई भनेका थिए, ‘धेरै चिन्ता नगर्नु, आफूले सक्दो गर्नु ।’ मलाई यसले केही नराम्रो गरेन, तर खेलाडी स्तब्ध थिए । उनीहरू रुने मनस्थितिमा थिए ।
वाइल्डले अगाडि भने, ‘पहिलो दिनदेखि नै समस्या थियो । खेलाडीलाई होस्टेल जस्तो होटलमा राखिएको थियो । खराब खाना थियो । मैले सोधेको थिएँ, बजेटको समस्या हो कि अरू केही हो । मलाई मुख्य प्रशिक्षक त बनाइएको थियो, तर मलाई टिमबाट अलग गरी अर्कै होटलमा राखिएको थियो । मैले भने, सबै एकै होटलमा हुनुपर्छ । उनीहरूले तीनतारे होटल दिन खोजे, मैले चारतारे मागेँ । त्यतिबेला नै एन्फा पदाधिकारीलाई लागेको थियो, यो प्रशिक्षकसँग काम गर्न सजिलो हुनेछैन । यो सब मैले खेलाडीका लागि चाहेको थिएँ ।’
आफूले गतिलो सहयोगीसमेत नपाएको उनले गुनासो गरेका छन् । ‘मैले त्यस्तो सहयोगी पाइनँ, जसले मलाई मद्दत गर्न सकोस् । म सबैसँग काम गर्न तयार छु, तर उनीहरू पनि त्यसका लागि योग्य हुनुपर्छ । मलाई त्यस्तो सहायकको के काम जसलाई कम्युटर पनि ‘हामीसँग जीपीएस थिएन । न ट्रेनिङमा क्यामेरा न त विश्लेषणका विवरण । यस्तो बेला मैले गर्ने नै के र ? म त ६१ वर्षको भइसकेँ । यो उमेरमा मेरो लागि खुसी नै सबैभन्दा ठूलो हो । मलाई यस्तो वातावरणमा अब काम गर्नु छैन । यो गुनासो मात्र होइन, वास्तविकता हो,’ उनी भन्छन् ।
उज्बेकिस्तानविरुद्धको खेल अगाडि प्रधानमन्त्री केपी शर्मा ओलीले खेलाडीलाई फोन गरेकोप्रति पनि उनले असन्तुष्टि जनाएका छन् । यसबाट खेलाडीहरूमा अनावश्यक दबाबमा परेको उनको टिप्पणी छ ।
उज्बेकिस्तानविरुद्ध टाइब्रेकरमा ४–५ जना खेलाडीहरूले पेनाल्टी हान्न नमानेको खुलासासमेत गरेका छन् । प्याट्रिकले भने, ‘यसपल्टको टाइब्रेकरमा दबाबका कारण तीन÷चार खेलाडी पेनाल्टी प्रहार गर्न नै तयार थिएनन् ।यो खेलको अवस्था मात्र थिएन । बिहान ११ बजे नै प्रधानमन्त्रीसहितका व्यक्तिहरूसँग भिडियो कन्फ्रेन्स थियो । यसले खेलाडीलाई अत्यधिक दबाबमा राख्यो ।मैले उज्वेकिस्तानी अफिसियललाई सोधेको थिएँ, के तिमीहरूलाई पनि आफ्नो देशका राष्ट्रपतिले फोन गरे ? उत्तर रह्यो, थिएन । रियल म्याड्रिडले च्याम्पियन्स लिग खेल्दा के अध्यक्ष पेरेजले प्रेसमिट राख्छन् त ? राख्दैनन् । यो सबै खेलाडीको फाइदाका लागि भएको थिएन । यो अरूको फाइदाका लागि भएको थियो । नेपालले पहिलो खेल जित्दा त्यस्तै बधाई सन्देश किन आएन ? किन कसैले सानै पुरस्कार पनि घोषणा गरेन ? तर सबैले महत्वको खेल अगाडिको क्षण नै कुरिरहे ? गेम हारेपछि भने कसैले त्यसरी नै फोन ग¥यो त ?’ अब एन्फासँग बेल्जियमबाटै कुरा गर्नुहुन्छ ? भन्ने प्रश्नमा उनको जवाफ छ, ‘थाहा छैन । म आफैले सम्पर्क राख्ने छैन । यदि मलाई कल आएमा मैले उत्तर भने दिनेछु । म नेपाल फर्कन चाहन्छु, केवल खेलाडीका लागि ।’
कप्तान नियुक्तिमा पनि विवाद भएको प्याट्रिकको स्वीकारोक्ति छ । उनले सावित्रा भण्डारीको कप्तानीको प्रशंसा गरे । सावित्रा नेपालले अहिलेसम्म पाएको सबैभन्दा उत्कृष्ट खेलाडी भएको बताए ।
यस्तै कप्तान छान्ने विषय पनि विवादरहित रहन सकेन । उनले नियमित कप्तान तथा गोलकिपर अञ्जिला तुम्बाप्पो सुब्बालाई सुरुआती ११ मा खेलाएनन् । उनको सट्टा अनुभवविहीन अञ्जना रानामगरलाई वाइल्डले मौका दिए ।
तर, यो विषय खुब आलोचना भयो । हुन् त एन्फाले अञ्जिला सुरुआती ११ मा नपरेपछि रेनुका नगरकोटे कप्तान भएको भन्दै घोषणा गरेको थियो । यसअघिका केही खेलमा पनि उनले अञ्जिलाको उपस्थितिमा टोलीको कप्तानी गरेका थिए ।
रेनुका तिनै खेलाडी हुन् जो घाइते हुँदा सन् २०१९ मा अञ्जिलाले कप्तानी पाएकी थिइन्। तर, केही मिनेटपछि नै एन्फाले स्ट्राइकर सावित्रा भण्डारी नेपालको ११औं कप्तान भएको घोषणा ग¥यो ।
तर, एन्फा महासचिव किरण राईले अञ्जिला बेन्चामा हुँदा उपकप्तान सावित्रा भएको कारण कप्तानी जिम्मेवारी दिइएको बताउँछन्। यद्यपि, सावित्राले उपकप्तानी जिम्मेवारी पाएको कहिल्यै एन्फाले घोषणा नै गरेको थिएन ।
वाइल्ड भन्छन्,‘गीता राना र सरस्वती हमाल पनि राम्रो खेलाडी हुन्। तर, कप्तान छनोट गर्दा विवाद भयो । त्यसबेलासम्म मै बुझिसकेको थिएँ म स्वतन्त्र रुपमा काम गर्न पाउँदिनँ।’
सवित्रा नेपालले पाएको अहिलेसम्मकै उत्कृष्ट खेलाडी भएको उनी स्वीकार्छन्। उनीबिना नेपालले जित्न गाह्रो हुन्छ । छनोट प्रतियोगितामा उनले लगातार दुई ह्याट्रिकसहित ९ गोल गरिन् । उनी नेपालको जर्सीमा सबैभन्दा बढी गोल गर्ने खेलाडी हुन् । उनले आफ्नो अन्तर्राष्ट्रिय गोलसंख्या ६७ मा पु¥याएकी छन् ।
उनकै एकल प्रदर्शनमा नेपालले लाओसलाई ९–० र श्रीलंकालाई ८–० ले हराएको थियो । तर, अन्तिम खेलमा नेपाललाई ३–३ को पुनरागमन दिलाइन् । यसमा एक गोल रेखा पौडेलको कर्नर बलमा गीता रानाको पनि रह्यो ।
योसँगै नेपाल पेनाल्टी सुटआउटमा पुगेको थियो । तर, पेनाल्टीमा सावित्रा र अञ्जना चुक्दा नेपालले एसियन कप, विश्वकप र ओलम्पिक खेल्ने सबै मौका गुमायो । खेलाडीहरूको व्यवस्थाबारे पनि उनी गम्भीर छन् ।
भन्छन्,‘कहिलेकाहीँ होटलमा बरफ (आइस) पनि हुँदैनथ्यो। बरफसम्म नपाइने अवस्था कल्पना गर्न सक्नुहुन्छ? म त्यस्तो प्रशिक्षक होइन, जो केवल कफी पिएर निर्देशन दिन्छु। म खेलाडीहरूसँगै पसिना बगाउन चाहन्छु।’
अन्तर्वार्ताभर वाइल्डले बारम्बार स्वतन्त्रतामाथिको अंकुश र आफूलाई निर्णय लिन नदिएको अवस्थाप्रति असन्तुष्टि व्यक्त गरेका छन् । उनले आफू नेपाल पैसा कमाउन नआएको बताएका छन् ।
यता एन्फाले उनीसँग एक वर्षको सम्झौता गरे पनि उनले पारिश्रमिकस्वरुप कति रकम पाउने हो भनेर खुलाएको छैन । वाइल्ड भन्छन्,‘मेरो तलब कति छ भन्ने कसैलाई थाहा छ? म पैसा कमाउन नेपाल आएको होइन ।
म पैसाको लागि आएको होइन भने किन अरुको दबाबमा काम गर्नु?’ बेल्जियमका प्याट्रिकलाई गत जेठ २८ गते एन्फाले महिला फुटबल टिमको प्रमुख प्रशिक्षक नियुक्त गरेको थियो ।
उनी महिला टिमका दोस्रो विदेशी प्रशिक्षक हुन् । यसअघि उनले नेपाल सुपरलिगमा काठमाडौं रेन्जर्सलाई प्रशिक्षण दिएका थिए । ६१ वर्षीय प्याट्रिकसँग एन्फाको एक वर्षको सम्झौता छ ।
एसियन कपमा छनोटन हुन असफल भएपछि नेपाली महिला फुटबल टिमले तत्काल खेल्ने कुनै अन्तर्राष्ट्रिय प्रतियोगिता छैन । एसियन कप देखि विश्वकप र ओलम्पिकको ढोका बन्द भएपछि अब महिला टोली साफ च्याम्पियनसिप र केही मैत्रीपूर्ण खेलमै खुम्चिनुपर्ने हुन्छ ।
