२६ साउन, विराटनगर । प्रसिद्ध अन्तर्राष्ट्रिय उत्प्रेरक वक्ता डा. उज्ज्वल पाटनीको चर्चित कार्यक्रम ‘बिजनेस ब्लु प्रिन्ट नेपाल’ पहिलोपटक काठमाडौंमा आयोजना हुने भएको छ ।
यही भदौ १२ गते, २०८१ मा काठमाडौंस्थित होटल म्यारियटमा हुने उक्त कार्यक्रमको मुख्य प्रायोजक शिवम् सिमेन्ट लिमिटेड रहेको छ ।
नेपालका व्यावसायिक तथा औद्योगिक क्षेत्रका उद्यमी, युवा तथा स्टार्टअप सञ्चालकहरूलाई लक्षित गरी आयोजना गर्न लागिएको यस कार्यक्रमले व्यावसायिक सफलताको खाका, नेतृत्वदायी क्षमताको विकास, बिक्री रणनीति, ब्रान्ड निर्माण र आधुनिक व्यवसाय सञ्चालनका व्यावहारिक पक्षहरूमा मार्गदर्शन गर्ने विश्वास लिइएको छ ।
शुक्रबार काठमाडौंमा आयोजित पत्रकार सम्मेलनमा कार्यक्रमका संयोजक तथा जिनियस टक्सका प्रबन्धक कृष्ण शाहले यस्ता कार्यक्रमले व्यवसायीहरूलाई थप प्रेरणा र सही दिशा प्रदान गर्ने विश्वास व्यक्त गरे।
“डा. पाटनीले आजसम्म १० हजारभन्दा बढी सेमिनारहरू गरिसक्नुभएको छ, तर काठमाडौंमा उनको यो पहिलो शो हो,“ शाहले भने, “यो कार्यक्रमले नेपाली व्यवसायीलाई सफलताका लागि आवश्यक रणनीति र कार्यान्वयनका तरिका प्रत्यक्ष रूपमा सिकाउनेछ।”
कार्यक्रममा शिवम् सिमेन्टका सेल्स एन्ड मार्केटिङ हेड निखिल अग्रवालले व्यावसायिक क्षेत्रका विज्ञहरूको अनुभवले नयाँ ऊर्जा प्रदान गर्ने र यस्ता कार्यक्रमहरूले समग्र व्यावसायिक क्षेत्रको विकासमा योगदान पुर्याउने बताए । उनले यस्ता ज्ञानवर्दक कार्यक्रममा शिवम् सिमेन्टले भविष्यमा पनि सहकार्य गर्दै जाने प्रतिबद्धता व्यक्त गरे ।
डा. उज्ज्वल पाटनीले यसअघि भारत तथा अन्य देशहरूमा सञ्चालन गरेका यस्तै कार्यक्रमहरू अत्यन्त सफल र प्रभावशाली साबित भएका छन् ।
नेपालमा पहिलोपटक हुन लागेको यो संस्करणले यहाँको व्यावसायिक समुदायलाई सशक्त, सचेत र रणनीतिक बनाउने विश्वास लिइएको छ ।
कार्यक्रमले नेपाली व्यवसाय सञ्चालनको सोच र दृष्टिकोणमा सकारात्मक परिवर्तन ल्याउने अपेक्षा गरिएको आयोजकले जनाएको छ ।
