१ असोज , काठमाण्डौ ।
असोज ३ गते संविधान दिवसका दिन पारेर शक्ति प्रदर्शन गर्ने सोही मेसोमा केही दिनदेखि गुप्तवासमा रहेका अध्यक्ष केपी शर्मा ओलीलाई पनि मैदानमा उतार्ने एमाले नेता महेश बस्नेतको दाबी झुटो रहेको पुष्टि भएको छ । साथै जेनजी आन्दोलनपछि शिवपुरीबाट ओलीले लेखेको भनिएको पत्रसमेत नक्कली रहेको खुलेको छ ।
यसको खुलासा एमाले उपमहासचिव प्रदीप ज्ञवालीले गरेका हुन् । उनले निवर्तमान प्रधानमन्त्री ओलीले जेनजी आन्दोलनकारीका नाममा लेखेको भनिएको चिठी, उनलाई शिवपुरीको सैनिक घेरामा राखिएको र संविधान दिवसमा सार्वजनिक हुनेजस्ता कुरा अफवाहमात्रै भएको बताएका छन् ।
संचारमाध्यमसँग कुरा गर्दै ज्ञवालीले भने, ‘हिजो मेरो कुरा भएको थियोे, परिस्थिति अझै अनुकूल नभएको अवस्थामा सुरक्षित रहनु नै उपयुक्त हुने कुरा भयो ।’ उनका अनुसार कम्तिमा अझै पाँच–सात दिन बाहिर निस्कने कि ननिस्कने भन्ने कुराको टुंगो छैन ।
ओलीले आफू शिवपुरीस्थित सैनिक नियन्त्रणमा रहेको भन्दै जेनजी आन्दोलनकारीलाई सम्बोधन गरी केही दिनअघि सार्वजनिक चिठी आधिकारिक नभएको उनले बताए । ‘न उहाँ शिवपुरीमा हुनुहुन्छ, न त त्यो पत्र उहाँको हो’, उनले भने ।
‘संगठित राज्यसँग लड्न सकिन्छ, गैरराज्यसँग अर्थात माओवादीसंग लडेकै हौं, तर निरंकुशतासँग लड्न गाह्रो हुन्छ’, उनले भने, ‘नयाँ सरकार बनेको मात्र छ, पूर्णता पाएको छैन, यो सरकार कस्तो बन्छ, यसले के के गर्छ भन्ने कुराका आधारमा हामीले काम गर्नुपर्ने छ ।’
अहिलेका सबै घटनाक्रममा एमाले र त्यसका नेतामाथि प्रहार केन्द्रित भएको भन्दै उनले सबभन्दा बढी सचेत र सुरक्षित पनि एमालेकै नेता, कार्यकर्ता हुनुपर्ने बताए । ओली प्रतिकूल परिस्थितिका कारण सेनाको सुरक्षाभित्र रहेको ज्ञवालीले बताए ।
तर, उक्त सुरक्षा घेरालाई सैनिक नजरबन्द वा गिरफ्तारीका रुपमा चर्चा गर्नु आपत्तिजनक रहेको उनी बताउँछन् । यसैबीच एमाले केन्द्रीय कार्यालयले असोज ३ गते संविधान दिवस देशभर भव्यतापूर्वक मनाउन आफ्ना सबै प्रदेश र जिल्ला कमिटीलाई निर्देशन दिएको छ ।
महासचिव शंकर पोखरेलले ३० भदौमा जारी गरेको परिपत्रमा संविधान २०७२ नेपालको सार्वभौमसत्ता सम्पन्न ऐतिहासिक उपलब्धि भएको उल्लेख गर्दै यस दिवसलाई पार्टीस्तरबाट विशेष कार्यक्रमसहित मनाउन आग्रह गरिएको छ ।
विज्ञप्तिमा भनिएको छ, ‘भदौ २३ र २४ का दुःखद् घटनापछि राजनीतिक परिस्थिति असहज बनेको छ । आन्दोलनका नाममा संवैधानिक व्यवस्थालाई कमजोर पार्ने षड्यन्त्र भइरहेका छन् । युवाहरूको मागविपरीत मुलुकलाई प्रतिगमनतर्फ धकेल्ने प्रयास भइरहेका बेला संविधानको रक्षा गर्न आवश्यक छ ।’
एमालेले काठमाडौं उपत्यकामा पार्टी केन्द्रीय कार्यालय, च्यासल, ललितपुरको प्राङ्गनमा विशेष कार्यक्रम आयोजना गर्ने जनाएको छ भने देशभरका जिल्लामा समेत समानान्तर कार्यक्रम गर्ने तयारी गर्न सबैलाई आह्वान गरेको छ ।
संविधान दिवस प्रत्येक वर्ष ३ असोजमा मनाइन्छ । यस दिन संविधानसभामार्फत २०७२ सालमा नेपालको संविधान जारी भएको स्मरण गरिन्छ । यसअघि भने एमाले स्थायी कमिटी सदस्य रहेका महेश बस्नेतले बुधबार–बिहीबारभित्रै काठमाडौंमा १० औं हजारको भिड उतार्ने उद्घोष गरेका थिए ।
मंगलबार जेन–जी आन्दोलनका क्रममा आगजनी गरेर जलाइएको एमाले केन्द्रीय कार्यालयमा आयोजित सभालाई सम्बोधन गर्दै यस्तो घोषणा गरेका थिए । यस्तै असोज ३ गते संविधान दिवसका अवसरमा एमालेले कार्यक्रम गर्ने र त्यही कार्यक्रममा अध्यक्ष केपी शर्मा ओलीलगायतका नेता उत्रिने पनि उनले बताएका थिए ।
तर त्यो अफवाह भएको उनकै उपमहासचिवले प्रष्ट पारेका छन् । यद्यपि जेन–जी आन्दोलनपछि सत्ताबाट बाहिरिएको एमालेले संविधान दिवसको अवसर पारेर पुनः सक्रिय हुने बाटो समाएको हो । यता प्रचण्ड, माधव नेपाल लगायतका प्राय नेताहरु नेपाली सेनाको सुरक्षा घेराबाट बाहिर निस्किएपनि ओली भने अहिलेसम्म सार्वजनिक भइसकेका छैनन् ।
