३० असोज , काठमाण्डौ ।
नेकपा एमालेको केन्द्रीय कमिटीको दोस्रो दिनको बैठक आज बिहान नै बाट बस्दै छ । आजको बैठकमा पनि केन्द्रीय सदस्यहरूले अध्यक्ष केपी शर्मा ओलीको राजनीतिक प्रस्ताव माथि धारणा राख्ने क्रम जारी रहने छ ।
हिजोको पहिलो दिनको बैठकमा ५० जना केन्द्रीय सदस्यहरूले आफ्ना धारणा राखेका थिए । आज बाँकी केन्द्रीय सदस्यहरूले धारणा राख्ने पार्टी प्रचार तथा प्रकाशन विभागका प्रमुख राजेन्द्र गौतमले बताए ।
बैठकका क्रममा एक सय जना भन्दा बढीले बोल्ने अनुमान गरिएको छ । बोल्न चाहने सदस्यहरूको सङ्ख्या बढे बैठक लम्बिने एमाले नेताहरू बताउँछन् । धारणा राख्न हरेक केन्द्रीय सदस्यहरूलाई ३ मिनेटको समय दिइएको छ ।
तीन मिनेटमा आफ्ना धारणा नटुङ्ग्याए स्वतः माइक काटिने प्रबन्ध गरिएको छ । हिजोको बैठकमा अध्यक्ष ओलीले जेनजी आन्दोलनपछि प्रतिनिधि सभा विघटन असंवैधानिक भन्दै पुनस्र्थापनाका लागि आन्दोलनमा जाने र आगामी मङ्सिर २७ देखि २९ गतेसम्म पोखरामा पार्टीको ११ औँ महाधिवेशन गर्ने प्रस्ताव गरेका थिए।
बैठकमा केन्द्रीय सदस्यहरूका धारणा सुनेपछि पदाधिकारीहरूले पनि आफ्ना धारणा राख्नेछन् । अन्त्यमा अध्यक्ष ओलीले बैठकमा आएका सुझाव र जिज्ञासाहरूको एकमुष्ट जवाफ दिने तयारी छ ।
बैठकमा केन्द्रीय सदस्य लक्ष्मी गौतमले अध्यक्षको राजीनामा माग्ने पदाधिकारीलाई पहिले आफूले राजीनामा दिन सुझाएकी थिइन् । ‘केही पदाधिकारीहरूले सचिवालय बैठकमा अध्यक्षको राजीनामा माग्नु भयो रे,’ गौतमले भनिन्, ‘तपाईँहरू पनि दुई पटक पदाधिकारी भइसक्नु भयो। तपाईँहरूको राजीनामा हामी केन्द्रीय सदस्यले माग्यौँ भने दिनुहुन्छ?’
गौतमले कसैले राजीनामा मागेकै भरमा एक वर्ष कार्यकाल बाँकी रहेको पार्टी केन्द्रीय कमिटीको महाधिवेशन गर्न हतारिनु नपर्ने पनि बताइन्। ‘हाम्रो कार्यकाल अझै एक वर्ष छ। कसैले राजीनामा मागेकै कारण हतारिएर महाधिवेशन गर्नुपर्ने स्थिति छैन,’ गौतमले भनिन्।
अर्का केन्द्रीय सदस्य रोमनाथ ओलीले केपी ओलीको विकल्प खोजेर पार्टीमा विवाद निम्त्याउने समय अहिले नभएको बताए।
