१६ कार्तिक , काठमाण्डौ ।
गृहमन्त्री ओमप्रकाशमाथि गालीगलौजसहित प्रधानमन्त्री सुशीला कार्कीको राजीनामा माग गरेर आज माइतीघर मण्डलामा प्रदर्शन गर्ने भनी सामाजिक सञ्जालबाट घोषणा गरेका अभियन्ता निकोलस भुसाल सम्पर्कविहीन भएका छन् ।
लागूऔषध सेवन गरी कार्यक्रमको घोषणा गरेको र त्यसले मुठभेड निम्त्याउने खतरा रहेका कारण त्यसअगावै उनलाई नियन्त्रणमा लिन लागिएको हो । प्रहरी भुसालको खोजीमा छ । तर, उनी न घर–परिवारको सम्पर्कमा रहेका छैनन् ।
उनी भेटिएमा रिह्याव सेन्टरमा पठाउने तयारी छ । उनको खोजीमा काठमाडौंका विभिन्न प्रहरी टोली आइतबार बिहानैदेखि सक्रिय छ । उनी बस्ने डेरामा पुग्दा बाहिरबाट साँचो लगाइएको छ, मोबाइलको स्वीच पनि अफ छ ।
प्रहरीले पारिवारिक सम्पर्कको माध्यमबाट उनको पहिचान गर्न खोज्दा परिवारका सदस्यले पनि आफूहरूको सम्पर्कमा नरहेको बताएका छन् । उनले आइतबार अपराह्न २ बजे सरकारविरुद्ध माइतीघर मण्डलामा प्रदर्शन गर्ने भनेका छन् ।
तर, जिल्ला प्रशासनसँग आइतबार त्यहाँ कुनै किसिमको प्रदर्शन वा कार्यक्रमका लागि अनुमति नलिइएको जिल्ला प्रहरी प्रवक्ता एसपी पवन भट्टराईले बताए । भुसालले प्रदर्शन गर्ने खबरपछि एमालेसम्वद्ध युवा संघ र काठमाडौंका मेयर बोलन साहका समर्थकले उनको प्रतिकार गर्ने योजना बनाएका छन् ।
नशाको तालमा उनले कार्यक्रमको घोषणा गरेको र त्यसले मुठभेड निम्त्याउने खतरा रहेका कारण त्यसअगावै उनलाई नियन्त्रणमा लिन लागिएको प्रहरीस्रोतले जनाएको छ । हिजो ‘पहिला देश (पिपुल्स रेभुलेसन) अभियान’ ले तत्कालीन प्रधानमन्त्री केपी ओली, गृहमन्त्री रमेश लेखक र सिडिओलाई पक्राउ नगरेको विरोधमा आज प्रदर्शन गर्ने घोषणा गरेको थियो ।
शनिबार राजधानीको संवाद डबलीमा पत्रकार सम्मेलनको आयोजना गरी अभियानले जेनजीको मागअनुसार काम गर्न नसकेको भन्दै अन्तरिम सरकारकी प्रधानमन्त्री सुशीला कार्कीको राजीनामासमेत माग गरेको छ ।
पहिला देश अभियानका डा. निकोलश भुसालले जेन–जी आन्दोलन मुख्यतया सुशासन, भ्रष्टाचार मुक्त समाज र कार्यकारी प्रमुखको लागि भएको बताएका थिए । तर, वर्तमान सरकार उल्टो दिशामा गएको उनको आरोप छ ।
भुसालले जेनजीलाई गोली हान्न आदेश दिने ओली र लेखकलाई पक्राउ गरी अनुसन्धान गर्नु सरकारको पहिलो प्राथमिकता भए पनि त्यसो नगरेको कारण कार्तिक १६ गते प्रदर्शनमा उत्रन बाध्य भएको बताएका थिए ।
यसअघि गत असोज २३ गते माइतीघर मण्डलामै प्रदर्शनका क्रममा उनी पक्राउ परेका थिए । स्वास्थ्य जाँच गर्दा उनले गाँजा सेवन गरेको पुष्टि भएको थियो । त्यसअघि २०८१ पुस ७ गते पनि उनी पक्राउ परेका थिए ।
कास्की प्रहरीको हिरासतमा रहेका रास्वपा सभापति रवि लामिछाने हिरासतभित्र बसेको फोटो सार्वजनिक गरेबापत पक्राउ परेका थिए ।
