२० कार्तिक , काठमाण्डौ ।
अमेरिकी राष्ट्रपति डोनाल्ड ट्रम्पको प्रशासनले जनवरीदेखि अमेरिकामा झन्डै ८० हजार गैर–आप्रवासी भिसा रद्द गरेको छ । अमेरिकी विदेश मन्त्रालयका एक वरिष्ठ अधिकारीले यो जानकारी दिएको भन्दै अन्तर्राष्ट्रिय सञ्चारमाध्यमहरूले समाचार छापेका छन् ।
यी भिसा रद्द हुनुका कारणहरूमा मादक पदार्थ सेवन गरी गाडी चलाउनु (डीयूआई), मारपिट र चोरी जस्ता आपराधिक गतिविधिहरू लगायत रहेको बताइएको छ । एउटा समाचार एजेन्सीको रिपोर्ट अनुसार, डीयूआई मामिलामा १६ हजार, मारपिटको घटनामा १२ हजार र चोरीका मामिलामा करिब ८ हजार भिसाहरू रद्द गरिएका छन् ।
यो कदमलाई ट्रम्प प्रशासनको कडा आप्रवासन नीतिको अंश मानिएको छ । प्रशासनले अवैध आप्रवासीहरूलाई मात्र देश निकाला गर्ने काम तीव्र पारेको छ । तर मान्य भिसा धारकहरू विरुद्ध कारबाही गर्न पनि जारी राखेको छ ।
अमेरिकी विदेश नीति विपरीत गतिविधिहरूमा संलग्न भएकोले आफूले हजारौँ भिसा रद्द गरेको मे महिनामा विदेश मन्त्री मार्को रुबियोले भनेका थिए । नयाँ नीतिहरू अन्तर्गत, विदेश मन्त्रालयले राजनीतिक रूपमा सक्रिय वा वाशिंगटनको प्रतिकूल विचार राख्ने आवेदकहरूसँग व्यवहार गर्दा विशेष सावधानी अपनाउन विश्वभरका अमेरिकी दूतावासहरूलाई निर्देशन दिएको थियो ।
ट्रम्प प्रशासनका अधिकारीहरूले प्यालेस्टाइनलाई समर्थन गर्ने वा इजरायली कदमको आलोचना गर्ने विद्यार्थी वा ग्रिन कार्ड धारकहरूले भिसा रद्द वा निर्वासनको सामना गर्न सक्ने पनि बताएका छन् । यसबीच पछिल्लो समय अमेरिकाका ट्रम्पप्रतिको जनविश्वास कमजोर हुँदै गइरहेको छ ।
हालै भएको राष्ट्रिय ट्र्याकिङ सर्वेक्षणका अनुसार ट्रम्पलाई समर्थन गर्नेको अनुपात झरेर ३७ प्रतिशतमा आएको छ । यो हालैका वर्षहरूमा सबैभन्दा कमजोर हो । सर्वेक्षण सहभागी भएका ६८ प्रतिशत अमेरिकीहरूले सङ्घीय सरकारको कामजकाज निकै खराब भएको बताएका छन् ।
२६ प्रतिशतले मात्रै सरकारको कार्यसम्पादनलाई सन्तोषजनक वा सकारात्मक रूपमा मूल्याङ्कन गरेका छन् । ट्रम्प प्रशासनले मुद्रास्फीति, सीमा सुरक्षा, स्वास्थ्य सेवा र अन्तर्राष्ट्रिय तनावलाई सम्बोधन गरिरहेको दाबी गरिरहँदा सर्वेक्षणको यो नतिजा आएको हो ।
स्वतन्त्र मतदाता र शहरी युवाहरूमाझ ट्रम्पलाई समर्थन गर्नेको संख्यामा तीव्र कमी आएको देखिएको छ । सर्वेक्षणको रुझानका अनुसार, १८–२९ उमेर समूहमा ट्रम्पलाई समर्थन गर्ने ३१ प्रतिशत मात्रै थिए ।
यसले युवा मतदाताहरूले आर्थिक सम्भावना, विद्यार्थी ऋण नीति र सामाजिक मुद्दाहरूको बारेमा बढी आलोचनात्मक दृष्टिकोण लिइरहेको संकेत गरेको छ । ३०–४९ उमेर समूहमा समर्थन दर ३५ प्रतिशत छ भने ५० वर्षभन्दा बढी उमेर समूहमा भने यो ४२ प्रतिशत थियो ।
ह्वाइट हाउसले सर्वेक्षणलाई अस्थायी सार्वजनिक भावना भनेको छ । प्रशासनले आर्थिक पुनप्राप्ति, ऊर्जा सुरक्षा र सीमा नियन्त्रणमा नीतिगत प्रगति गरिरहेकोमा उसले जोड दिएको थियो । प्रशासनको ध्यान नीतिगत काममा भएको र असले कस्तो मूल्याङ्कन गर्न भन्नेमा नभएको सरकारका प्रवक्ताहरूले तर्क गरेका छन् ।
उता, डेमोक्र्याटिक नेतृत्वले भने प्रतिवेदनलाई जनताको स्पष्ट अभियोगको भनेको छ । ट्रम्पप्रति जनविश्वास घट्दै जानुको अर्थ रिपब्लिकन रणनीतिमा परिवर्तनमाथि प्रकाश पारेको राजनीतिक पर्यवेक्षकहरू विश्वास गर्छन् ।
ट्रम्पप्रतिको समर्थन दरमा कमी प्रशासनको लागि चेतावनी भएको वासिङ्टन पोस्टले लेखेको छ । स्वतन्त्र मतदाताहरूमाझ विश्वास गुमाउनु भनेको २०२६ को लागि गम्भीर संकेत हो भनेर न्यूयोर्क टाइम्सले भनेको छ । आर्थिक सूचकहरूमा सुधार भएमा समर्थन दर पुनः बढ्न सक्ने फक्सले लेखेको छ ।
सीएनएनले राजनीतिक ध्रुवीकरण र संसदमा गतिरोधलाई असन्तुष्टिको मुख्य कारणको रूपमा उल्लेख गरेको छ । आगामी महिनाहरूमा आर्थिक सूचकहरू र नीतिगत स्थितिहरूमा सुधार महत्त्वपूर्ण भएको राजनीतिक सञ्चार विज्ञहरूले भनेका छन् ।
