५ मंसिर, काठमाण्डौ ।
बाराको सिमरामा बुधबारदेखि प्रदर्शन गरिरहेका जेनजी युवालाई वार्तामा बोलाएको स्थानीय प्रशासनले अब वार्ता नै आवश्यक नभएको बताएको छ । जिल्ला प्रशासन कार्यालयले बिहीबार प्रदर्शनकारीलाई औपचारिक वार्ताको लागि आह्वान गरेपनि बारा प्रशासनले प्रशासनले गर्नु पर्ने कार्य गरिरहेकाले औपचारिक वार्ता गरिरहन आवश्यक नरहेको बताएको छ ।
बाराका प्रमुख जिल्ला अधिकारी धर्मेन्द्रकुमार मिश्रले आन्दोलनरत पक्षका मुख्य माग पूरा भइसकेकोले अब औपचारिक वार्ताको आवश्यकता नरहेको बताएका छन् । यद्यपि वार्ताका लागि प्रशासनको ढोका सधै खुला रहेको उनले बताएका छन् ।
औपचारिक वार्ता गर्नुपर्ने कुनै विषय नरहेको निष्कर्षमा बारा प्रशासन पुगेको जिल्ला प्रहरी कार्यालय बाराका प्रमुख प्रहरी उपरीक्षक सन्तोष तामाङले बताए । ‘हामीले आफ्नो काम गरिरहेका छौं । जाहेरी परेका मानिस पक्राउ गरिरहेका छौं,’ एसपी तामाङले भने, ‘वार्तामा बस्नु पर्ने गरी अन्य माग छैनन् ।’
बुधबार एमाले नेता–कार्यकर्ताले केही जेनजी युवालाई कुटपिट गरेपछि चर्किएको विवादको कारण दुई दिनदेखि बारा अशान्त छ । कफ्र्यू आदेशसमेत अवज्ञा गर्दै जेनजी युवाले बुधबार र बिहीबार दिनभर नै वीरगञ्ज–पथलैया सडकखण्डको सिमरा चोकमा टायर बालेर प्रदर्शन गरेका थिए ।
सो क्रममा प्रहरीले अश्रु ग्यास र हवाई फायर समेत गर्नुपरेको थियो । यता बाराको सिमरामा जेनजीलाई कुटेको आरोप लागेका नेकपा एमालेका कार्यकर्ता अरबिन्द साहलाई पनि प्रहरीले पक्राउ गरेको छ।
उनलाई बिहीबार साँझ पक्राउ गरिएको मधेस प्रदेशका प्रहरी प्रमुख डीआईजी गोविन्द थपलियाले जानकारी दिएका छन् । जेनजी कुटेको आरोपमा यसअघि नै एमालेबाट निर्वाचित जितपुर सिमरा उपमहानगरपालिकाका–२ का वडाध्यक्ष धनबहादुर श्रेष्ठ र वडा नम्बर ६ का अध्यक्ष कैमद्विन अन्सारीलाई पक्राउ गरेको थियो।
गएको बुधबार एमालेले सिमरामा गर्न लागेको कार्यक्रमका क्रममा जेनजी र एमाले कार्यकर्ताबीच झडप हुँदा त्यहाँको अवस्था असामान्य बनेको थियो । बुधबार एमालेका महासचिव शंकर पोखरेल र पोलिटब्युरो सदस्य महेश बस्नेत सिमरा आउने थाहा पाएपछि जेनजीले प्रदर्शन गरेका थिए।
जेनजीको विरोध प्रदर्शनपछि दुवै नेता सिमरा जान नसकी काठमाडौँमै रोकिएका थिए। विरोध प्रदर्शनको क्रममा स्थानीय एमाले कार्यकर्ताले जेनजी प्रदर्शनकारीमाथि कुटपिट गरेका थिए।
स्थानीय जेनजी अगुवा सम्राट भनिने साइकुस उपाध्यायले उनीहरुविरुद्ध इलाका प्रहरी कार्यालय सिमरामा बुधबार जाहेरी दिएपछि प्रहरीले उनीहरुलाई पक्राउ गरेको हो। जेनजीको मुख्य माग कुटपिटमा संलग्न साहलाई पक्राउ गर्नुपर्ने थियो।
उनीहरुलाई पक्राउ गरेर कारबाही गर्नुपर्ने माग गर्दै जेनजीले बिहीबार पनि सिमरामा प्रदर्शन गरेका थिए। आज भने अहिलेसम्म सिमराको अवस्था सामान्य छ। अवस्था सामान्य बन्दै गएकाले गएराति ८ बजेदेखि सिमरामा कफ्र्यु आदेश थप नगरिएको बाराका प्रमुख जिल्ला अधिकारी धर्मेन्द्र कुमार मिश्रले जानकारी दिएका छन्।
जेनजीको निरन्तरको प्रर्दशनले सिमरा नै अशान्त बनेपछि समन्वयका लागि जेनजी अभियान्ता सदन गुरुङ र जेनजीबाट खेलकुद मन्त्री बनेका बब्लु गुप्ता सिमरा तर्फ गएका छन् ।
आज दिउँसो २ देखि ३ बजेभित्र उनीहरू सिमरा आइपुग्ने बारा जेन–जी संयोजक सम्राट उपाध्यायले बताएका छन् । उपाध्यायले उनीहरु आइपुगेपछि प्रशासनसँग निर्णायक वार्ता गर्ने बताएका छन् ।
अरविन्द शाहलाई पक्राउ गर्नुपर्ने जेन–जीको मुख्य माग पूरा भइसकेको छ । तर, आफूहरुले भनेका अरु व्यक्तिहहरु पनि पक्राउ गर्न बाँकी रहेको उपाध्यायले बताए । अब जिल्ला प्रशासनसँग आन्दोलन स्थगित गरेर निर्णायक वार्तामा बस्ने तयारीमा जेन–जीहरू छन् ।
बब्लुसँगै अहिले भौतिकपुर्वाधार मन्त्री कुलमान घिसिङपनि मधेशमा छन् । भौतिक पूर्वाधार तथा यातायातमन्त्री घिसिङ र युवा तथा खेलकुदमन्त्री गुप्ताले आज बिहानै जनकपुरधामस्थित निर्माणाधीन रामजानकी रंगशालाको निरीक्षण गरेका छन्।
त्यस क्रममा मन्त्रीद्वय घिसिङ र गुप्ताले रंगशाला निर्माण रोकिनुको कारण, खेल मैदानको अवस्थालगायत विषयमा जानकारी लिएका छन् । रंगशाला निरीक्षणका क्रममा मधेसको खेलकुद मन्त्रालयका सचिव रञ्जित यादव, जिल्ला क्रिकेट संघका पदाधिकारी, खेलाडीले त्यहाँको वस्तुस्थितिबारे जानकारी गराएका थिए।
यसका साथै मन्त्रीहरू घिसिङ र गुप्ताले भासिएको कमला पुलको पनि निरीक्षण गर्न लागेका छन्। मन्त्री घिसिङले भासिएको कमला पुलका विषयमा छिट्टै निर्णय लिइने जानकारी दिए। उनले सञ्चारकर्मीको प्रश्नमा आफूले परिस्थिति बुझेर निर्णय गर्ने बताए। कमला पुल बन्नुपर्ने पक्षमा आफू रहेको पनि उनले बताएका छन् ।
