५ मंसिर, काठमाण्डौ ।

दुर्गा प्रसाईँ नेतृत्वको ‘राष्ट्र राष्ट्रिता धर्म संस्कृति र नागरिक बचाउ महाअभियान नेपाल’ ले विभिन्न बैंक, वित्तीय संस्था र शैक्षिक संस्थालाई धम्कीपूर्ण पत्र पठाउँदै चन्दा माग गरेको धम्कीपूर्ण पत्र बाहिरिएको छ ।

मंसिर ७ गतेबाट देशव्यापी अनिश्चितकालीन आमहड्तालको घोषणा गरेको प्रसाईंको अभियानले आफूहरूलाई साथ नदिए हुने तोडफोड, आगजनी र लुटपाटको जिम्मेवारी नलिने चेतावनी दिएको हो ।

प्रसाईं नेतृत्वको अभियानले आर्थिक सहयोगका लागि बैंक तथा वित्तीय संस्थाहरूलाई पत्र काटेको भेटिएको छ । प्रसाई भने अहिले शान्ति सुरक्षा भाँड्ने खालका अभिव्यक्ति दिएको आरोपमा थुनामा छन् ।

सर्वाेच्चले उनलाई बिहीबार मात्रै बन्दीप्रत्यक्षीकरणको सुनुवाइ गर्दै २४ घण्टाभित्र अदालतमा उपस्थित गराउन आदेश दिएको छ। अभियानका केन्द्रीय अर्थ संयोजक देविप्रसाद संग्रौलाले हस्ताक्षर गरिएको पत्रमा भनिएको छ, ‘…तपाईं राष्ट्रवादी देशभक्तहरूले स्वेच्छिक रुपमा नैतिक, आर्थिक, भौतिक सहभागीतासहित सहयोग गिरदिन हुन अपिल र आह्वान गर्दछौं ।’

उक्त पत्र पाएपछि बैंक तथा वित्तीय संस्थाका प्रमुख कार्यकारी अधिकृतहरू (सीईओ) छलफलमा जुटेका छन् । नियामक नेपाल राष्ट्र बैंकले भने बैंक बन्द गराउने र चन्दा मागेर धम्की दिने लगायतको कसैबाट पनि हुन नहुने र त्यसो भएमा सरकारसँग यसबारे छलफल गर्ने जनाएको छ ।

शान्ति सुरक्षा भाँड्ने खालका अभिव्यक्ति दिएको आरोपमा थुनामा रहेका दुर्गा प्रसाईंले केही दिनअघि धार्मिक गुरूहरूको मठमै गएर आफ्नो आन्दोलन र आर्थिक सहायताबारे छलफल गरेका थिए। पक्राउ पर्नुभन्दा केही दिनअघिको उक्त छलफलको भिडिओ ’हिमाल न्यूज’ ले सार्वजनिक गरेको छ।

त्यसमा माला लगाएर बसेका प्रसाईंले धर्मगुरूसँग आफ्नो आन्दोलनका लागि आर्थिक सहयोग मागेका छन्। राष्ट्र, राष्ट्रियता, धर्म, संस्कृति र नागरिक बचाउ महाअभियानका नाममा गतिविधि गरिरहेका प्रसाईंले नेपालको राष्ट्रियता र हिन्दु धर्म खतरामा परेको भन्दै त्यसलाई जोगाउने आन्दोलनका लागि धर्मगुरूहरूसँग चन्दा मागेका हुन्।

’यो आन्दोलनलाई सहयोग गर्न तपाईंहरू के गर्न सक्नुहुन्छ? बिनापैसा त आन्दोलन हुँदैन। मैले लड्ने यो अन्तिम लडाइँ हो,’ उनले भनेका छन्, ’यो लडाइँ लड्न मलाई हतियार चाहिएको छ। हतियार भनेको बन्दुक वा गोलीगठ्ठा होइन। मलाई अहिले पैसा चाहिएको छ।’ ’यो पैसा मैले व्यक्तिगत प्रयोगका लागि माग्न आएको होइन। देश जोगाउन पैसा चाहिएर माग्न आएको हुँ,’ उनले भनेका छन्।

यति मात्र होइन, उनले आफ्नो आन्दोलनमा सहयोग गर्न देशभरिबाट साधुसन्त बोलाउन पनि धर्मगुरूहरूसँग आग्रह गरेका छन्। ’म गेरूवस्त्र बिनाको जोगी हुँ। दुर्गा माताको भक्त हुँ। मैले पाथीभरा माताको दर्शन गर्न जाँदा आफ्ना छोराछोरीका लागि केही मागिनँ। यो व्यवस्था परिवर्तन गर्ने, संविधान परिवर्तन गर्ने शक्ति दिनुस् भनेर मागेँ,’ उनी भन्छन्, ’यो व्यवस्था परिवर्तन भएन भने म आफ्नो मुख देखाउन आउँदिनँ भनेर पाथीभरा मातालाई भनेर आएको छु।’

बैंक तथा वित्तीय संस्थाले ऋण मिनाहा गर्नुपर्छ भन्ने मागसमेत राख्दै आएका प्रसाईंले आफू बैंकहरूविरूद्ध होइन, संविधानविरूद्ध नै लागेकाले सहयोग गर्न आग्रह गरेको बैंकका सिइओहरुले बताएका छन् ।

प्रसाईंले पछिल्लो समय आन्दोलन भड्काउने अभिव्यक्ति दिँदै आएका थिए। देश गृहयुद्धमा जान लागेको र त्यसका लागि रासनपानी बन्दोबस्त गरेर राख्नू भन्ने जस्ता अभिव्यक्ति दिएर उनले समाजलाई भ्रमित पार्दै आएका थिए।

सामाजिक सञ्जालमा भाइरल भइरहेका उनका अभिव्यक्ति पत्याएर धेरैमा डर र त्रास छाएको थियो। त्यसबाहेक राजनीतिक तथा निजी क्षेत्रका सार्वजनिक व्यक्तित्वमाथि लाञ्छना लगाउने काम पनि उनले गर्दै आएका थिए।

पुष्टि नभएका आधारहिन र भ्रमपूर्ण सूचना फैलाएर राज्यविरूद्ध भड्काउने अभिव्यक्ति पनि दिँदै आएका थिए। त्यही क्रममा उनले प्रधानमन्त्री सुशीला कार्कीतर्फ लक्ष्य गर्दै व्यक्तिगत गालीगलौजपूर्ण अभिव्यक्ति र प्रहरीलाई लक्ष्य गर्दै भड्काउ भाषण दिएपछि शान्तिसुरक्षाको निम्ति उनलाई पक्राउ गरिएको छ ।

उनको समूहले उनलाई विनाशर्त रिहा गर्न अल्टिमेटम दिएको छ । उनीहरुको समूहबाट सरकारी वेभसाइटहरु ह्याक गरे धम्कीपूर्ण सन्देशहरु राखिएका घटनाहरु पनि सार्वजनिक भएका छन् ।

आन्दोलन घोषणा लगत्तै सरकारले वार्तामा बोलाएपनि प्रसाईको समूहले संविधान नै प्रतिकुल हुनेगरी संघीयता र संविधान खारेजीसहितका २७ बुँदे माग राखेका थिए र ती मागहरुपूरा हुन् नसक्ने सरकारले बताइसकेको छ ।

वार्तामा प्रसाई भने गएका थिएनन् । उनको समूहले निर्वाचन आयोगमा नागरिक बचाउ दल दर्ता गरिसकेको छ।