१९ मंसिर, काठमाण्डौ ।
पाकिस्तानका फिल्ड मार्शल आसिम मुनिर देशको पहिलो चिफ अफ डिफेन्स फोर्सेज (सीडीएफ) नियुक्त भएका छन् । विहीबार पाकिस्तानका राष्ट्रपति आसिफ अली जरदारीले उनलाई सो पदमा नियुक्त गर्ने औपचारिक स्वीकृति दिएका छन् ।
उनलाई यो पद पाँच वर्षको कार्यकालका लागि दिइएको छ । प्रधानमन्त्री शहबाज शरिफले पठाएको सिफारिस पत्रमा सेना प्रमुख र सीडीएफ दुवै पदमा नियुक्त गर्न अनुरोध गरिएकोमा राष्ट्रपतिले यो स्वीकृति दिएका हुन् ।
गत महिना पाकिस्तानको संसद्ले २७औँ पटक संविधान संशोधन पारित गरेको थियो, जसअन्तर्गत सीडीएफको पद सिर्जना गरिएको हो । यो पदको उद्देश्य देशको रक्षा संरचनामा एकीकृत कमान्ड सुनिश्चित गर्नु र जरुरी परिस्थितिमा छिटो निर्णय प्रक्रिया बलियो बनाउनु हो ।
सीडीएफ पदले चेयरम्यान, जोइन्ट चिफ अफ स्टाफ कमिटी (सीजेएससी)को स्थान लिएको छ, जुन पद अब हटाइएको छ । प्रधानमन्त्री कार्यालयको विज्ञप्ति अनुसार, प्रधानमन्त्रीले पहिले आसिम मुनिरलाई सेना प्रमुख र सीडीएफ दुवै पदमा नियुक्त गर्ने प्रस्ताव मन्जुर गरेका थिए ।
आसिम मुनिरलाई नोभेम्बर २०२२ मा सेना प्रमुख नियुक्त गरिएको थियो । त्यस समय उनको कार्यकाल तीन वर्षको थियो । तर, २०२४ मा यसलाई बढाएर पाँच वर्ष पारिएको थियो । अब भने उनी देशको पहिलो रक्षा बल प्रमुख र सेना प्रमुख दुवै पदमा नियुक्त भएका हुन् ।
उनले दुवै पद पाँच वर्षका लागि सम्हाल्नेछन् । यससँगै मुनीर एकैपटक दुवै पद सम्हाल्ने पहिलो पाकिस्तानी सैन्य अधिकारी बनेका हुन् । यसैगरी, वायु सेना प्रमुख जहीर अहमद बाबर सिद्धुको कार्यकाल थप दुई वर्ष बढाइएको छ, जुन मार्च २०२६ पछि लागू हुनेछ ।
नोभेम्बर १२ मा पाकिस्तानी संसदले २७ औं संवैधानिक संशोधन पारित गरेको थियो, जसले सेनाको शक्ति बढायो। सो संशोधनअन्तर्गत मुनीरलाई रक्षा बल प्रमुख बनाइएको हो। यो पदसँगै उनले पाकिस्तानको आणविक हतियारको कमान्ड पनि लिएका छन्, जसले उनलाई देशको सबैभन्दा शक्तिशाली व्यक्ति बनाएको छ।
मुनीरलाई नोभेम्बर २९, २०२२ मा सेना प्रमुख बनाइएको थियो। उनको मूल कार्यकाल नोभेम्बर २८, २०२५ मा सकिएको थियो। गत वर्ष संसदले सेना प्रमुखको कार्यकाल तीन वर्षबाट पाँच वर्ष बनाउने कानून पारित गरेको थियो।
गत महिना गरिएको संशोधनले संयुक्त सेना प्रमुखहरुको समितिको अध्यक्षको सट्टा रक्षा बल प्रमुखको नयाँ पद सिर्जना गरेको थियो । नोभेम्बर २७ मा संयुक्त सेना प्रमुखहरुको समितिको अध्यक्ष साहिर शमशाद मिर्जा अवकाशमा गएपछि मुनीरलाई रक्षा बल प्रमुख नियुक्त गरिएको छ ।
