विराटनगर,असोज २१
१० वर्षे सशस्त्र युद्ध सकिएको १५ वर्ष वितिसक्दा पनि त्यसक्रममा मारिएका, घाइते भएका र वेपत्ता पारिएकाहरुका परिवारले अझैसम्म न्याय नपाएको गुनासो गरेका छन् ।
आइतबार विराटनगरमा नागरिक आवाज नामक संस्थाले आयोजना गरेको न्यायको पखाई कहिलेसम्म सम्बन्धी कार्यक्रममा बोल्ने पीडितहरुले यस्तो बताएका हुन् ।
द्वन्द्वपीडित माया भट्टराईले २०५६ सालमा ससुराको हत्या भएको र आफ्ना श्रीमान् लोकेन्द्र भट्टराईलाई वेपत्ता पारेको यतिका समय हुँदा पनि न्याय नपाएको गुनासो गरिन् ।
यस्तै द्वन्द्वपीडितहरु खिनादेवी चापागाईं, गोपाल पोखरेल, गीता कार्की, होमादेवी अधिकारी, सम्झना तामाङल दुर्गा राई, दुर्गा कार्कीलगायतले अर्थपूर्ण न्यायको माग गरिन् । विभिन्न एनजिओ आइएनजिओले बेला बेलामा कार्यक्रम गर्ने तर राज्यको तर्फबाट न्याय दिन ढिलाई भएको तिर ध्यान नदिने गरेको प्रति उनीहरुले दुःख व्यक्त गरे ।
कार्यक्रममा सत्यनिरुपण तथा मेलमिलाप आयोग १ नम्बर प्रदेश मुकामका प्रमुख चिरञ्जीवि पराजुलीले ६३ हजार उजुरीमध्ये ३ हजार उजुरीको एक वर्षमा छानविन गरिएको जानकारी दिँदै मुकाम थप गर्नुपर्नेमा जोड दिए । उनले द्वन्द्वका घटनाको विषयमा सम्बन्धित जिल्लाहरुमा गएर अनुसन्धान गरिरहेको जानकारी दिए ।
