एजेन्सी,असोज २३
हङकङका तीन अन्तर्राष्ट्रिय क्रिकेटरलाई १९ पटक एन्टी करप्सन कोड मिचेको आरोपमा अन्तर्राष्ट्रिय क्रिकेट काउन्सिल (आईसीसी) ले निलम्बन गरेको छ ।
आईसीसीले इरफान अहमद, नदीम अहमद र हसिब अमजदलाई कुल १९ पटक नियम उल्लंघन गरेको आरोपमा निलम्बन गरेको हो । आरोपबारे अध्ययन भइरहेको र कुन हदसम्म कारबाही हुने अहिले नै निश्चीत भएको छैन ।
तीनै खेलाडीले जनवरी २०१४ मा भएको सन् २०१५ को विश्वकप छनोटका खेलमा मिलेमतो गरेको आरोप लागेको छ । इरफानले २०१४ विश्वकपको जिम्बावेविरुद्ध वार्मअप खेलमा पनि मिलेमतो गरेको आरोप छ ।
इरफानलाई ९ आरोप लागेको छ भने नदीम र अमजदमाथि ५–५ आरोप छ ।विश्वकप छनोट अन्तर्गत समूह चरणमा खेलेको स्कटल्यान्ड र क्यानाडाको खेल शंकाको घेरामा राखिएको छ । दुवै खेल हङकङले जितेपनि यस खेलमा आरोप लागेको छ । इरफान र हसिबले क्यानाडाविरुद्ध जानीजानी नराम्रो खेलेको आरोप छ ।
आईसीसीले २०१६ विश्वकपको कुन खेलमा मिलेमतो भएको भन्ने खुलाएको छैन । तीनै खेलाडीमाथि खेल फिक्स गर्न खोजेको, आफ्नो क्षमताअनुसार जानीजानी नखेलेको र खेल मिलेमतोको प्रयास थाहा हुँदा पनि जानकारी नदिएको आरोप छ ।
इरफानमाथि अन्य दुई खेलाडीभन्दा बढी आरोप छ । उनीमाथि आर्थिक प्रलोभनमा परेर खेलको नतिजा नै बदल्न खोजेको समेत आरोप छ ।
२८ वर्षीय इरफान यसअघि साढे २ वर्ष निलम्बनमा परेका थिए । त्यसबेला उनलाई मिलेमतोको प्रस्ताव आउँदा खबर नगरेको भन्दै मिलेमतोमा भने निर्दोष सावित गरिएको थियो ।
तीनै खेलाडीलाई अपिलका लागि २ साता समय दिइएको छ । हसिब अमजद यसअघि नेपालमा भएको विवादास्पद एसियन प्रिमियर लिग खेल्न नेपाल आएका थिए ।
