२३ भदौ , काठमाण्डौ ।
अविरल वर्षासँगै आएको बाढी र पहिरोका कारण देशभरका मुख्य राजमार्ग तथा सडकखण्ड प्रभावित भएका छन् । कतिपय ठाउँमा सडक पूर्ण रूपमा अवरुद्ध भएका छन् भने केही स्थानमा एकतर्फी मात्रै यातायात सञ्चालन भइरहेको छ । वर्षा अझै नरोकिएका कारण सडकमा यात्रा गर्ने यात्रु तथा चालकहरूलाई थप जोखिम बढेको छ ।
विशेषगरी पहाडी तथा हिमाली क्षेत्रमा पहिरो खस्ने, सडक भासिने र बाढीले सडक बगाउने क्रमका कारण लामो दूरीका यात्रामा समस्या देखिएको छ । यात्रा गर्नुअघि सडकको अवस्था बुझ्न र जोखिमयुक्त क्षेत्रमा उच्च सतर्कता अपनाउन प्रहरीले समेत आग्रह गरेको छ ।सबैभन्दा पहिले काठमाडौं उपत्यका जोड्ने सडकको अवस्थाबारे कुरा गरौँ ।
काठमाडौं–धादिङ सडकखण्डअन्तर्गत चन्द्रागिरि नगरपालिका–२ को चिसापानीमा पहिरोका कारण सडक एकतर्फी मात्रै सञ्चालन भइरहेको छ । पहिरोका कारण सडकको आवागमन प्रभावित भएपछि सवारी साधनहरूलाई सावधानीपूर्वक सञ्चालन गराइएको छ । यस्तै, पृथ्वी राजमार्गअन्तर्गत धादिङको बेनीघाट रोराङ–७ कृष्णभीरमा पहिरो खसेपछि सडक पूर्ण रूपमा अवरुद्ध भएको छ ।
पृथ्वी राजमार्गकै ज्वाङखोला र गजुरी–२ चालिसे क्षेत्रमा भने सडक एकतर्फी रूपमा सञ्चालनमा रहेको छ । यता, मुग्लिन–नारायणगढ सडकखण्डअन्तर्गत तुइनखोलामा सडक मर्मतको काम भइरहेकाले सवारी चाप हेरेर एकतर्फी आलोपालो प्रणालीबाट यातायात सञ्चालन भइरहेको छ ।
यसले गर्दा काठमाडौं बाहिरिने र भित्रिने यात्रुहरूले सडकको अवस्था बुझेर मात्रै यात्रा गर्नुपर्ने अवस्था आएको छ । अब रसुवा र नुवाकोटतर्फको अवस्था पनि गम्भीर छ ।रसुवाको उत्तरगया तथा मुख्य राजमार्गका विभिन्न स्थानमा बाढीका कारण सडक पूर्ण रूपमा अवरुद्ध भएको छ ।
त्यसैगरी नुवाकोटको टोखा–छहरे सडकखण्डमा सम्भावित बाढी तथा पहिरोको जोखिमलाई ध्यानमा राख्दै राति १० बजेदेखि बिहान ५ बजेसम्म सवारी साधन सञ्चालनमा रोक लगाइएको छ ।अर्थात्, रातिको समयमा यो सडकखण्ड हुँदै यात्रा गर्ने यात्रुले वैकल्पिक व्यवस्था गर्नुपर्ने अवस्था छ । अब कर्णाली प्रदेशतर्फ जाऔँ ।
कर्णालीका धेरैजसो मुख्य राजमार्ग तथा सडकखण्डहरू पहिरोका कारण प्रभावित भएका छन् ।मुगुको मुगु–गमगढी सडकखण्ड पहिरोका कारण पूर्ण रूपमा अवरुद्ध भएको छ । कालिकोटको कर्णाली राजमार्गअन्तर्गत गग्ने खोलामा पनि पहिरोका कारण सडक ठप्प भएको छ ।त्यस्तै, सल्यानको राप्ती राजमार्गअन्तर्गत चोरखोलामा पहिरो जाँदा यातायात पूर्ण रूपमा अवरुद्ध भएको छ ।
सुर्खेतको बराहताल क्षेत्रमा पनि पहिरोका कारण सडक पूर्ण रूपमा बन्द भएको जनाइएको छ । कर्णालीमा पहाडी भू–भाग, कमजोर सडक संरचना र लगातारको वर्षाका कारण सडक अवरुद्ध हुने समस्या थप गम्भीर बनेको छ । एउटा ठाउँको पहिरो हटाएर यातायात सञ्चालनमा ल्याए पनि अर्को ठाउँमा पुनः पहिरो खस्ने जोखिम कायमै छ ।
यता, लुम्बिनी प्रदेशमा पनि राजमार्ग प्रभावित भएको छ । रोल्पास्थित सहिद राजमार्गको भालखोरमा पहिरोका कारण यातायात पूर्ण रूपमा बन्द भएको छ । पहिरो हटाउने तथा सडक सञ्चालनमा ल्याउने प्रयास भए पनि लगातारको वर्षाका कारण सडकमा थप क्षति हुनसक्ने जोखिम रहेको छ ।अब काभ्रेको अवस्थाबारे पनि जानकारी लिऊँ ।
काभ्रेको खुर्कोट–नेपालथोक–कटुञ्जेबेँसी सडकखण्डमा सम्भावित बाढीको जोखिमलाई मध्यनजर गर्दै ठूला मालबाहक सवारी साधन सञ्चालनमा समय तोकिएको छ । १० टनभन्दा माथिका मालबाहक सवारी साधनलाई बेलुका ७ बजेदेखि बिहान ५ बजेसम्म सञ्चालनमा रोक लगाइएको छ ।
अन्य सवारी साधनलाई भने सडकको अवस्था हेरेर बिहान ४ बजेदेखि साँझ ६ बजेसम्म मात्रै सञ्चालन गर्न दिइने प्रहरीले जनाएको छ ।यसरी हेर्दा अहिले काठमाडौंलाई देशका विभिन्न भूभागसँग जोड्ने सडकदेखि कर्णाली, लुम्बिनी र अन्य पहाडी जिल्लाका सडकसम्म बाढी र पहिरोको प्रत्यक्ष प्रभाव परेको देखिन्छ । कतिपय सडक पूर्ण रूपमा बन्द छन् भने कतिपय सडकमा एकतर्फी यातायात मात्रै सञ्चालन भइरहेको छ ।
अझै वर्षा भइरहेका कारण अहिले खुलेका सडक पनि जुनसुकै बेला अवरुद्ध हुन सक्ने जोखिम छ । विशेषगरी पहिरो प्रभावित क्षेत्रमा सडकको माथिल्लो भागबाट ढुंगा तथा माटो खस्ने, सडक भासिने र खोलानालामा पानीको बहाव अचानक बढ्ने जोखिम रहने भएकाले यात्रुहरूलाई विशेष सावधानी अपनाउनुपर्ने हुन्छ ।
त्यसैले अत्यावश्यक कामबाहेक जोखिमयुक्त सडकखण्डमा यात्रा नगर्न र यात्रा गर्नैपर्ने भए सडकको पछिल्लो अवस्थाबारे जानकारी लिएर मात्रै यात्रा गर्न प्रहरीले आग्रह गरेको छ ।यात्राका क्रममा पनि पहिरो गएको स्थानमा लामो समय रोकिने, खोलाको किनार वा जोखिमयुक्त क्षेत्रमा सवारी पार्क गर्ने तथा रातिको समयमा जोखिमपूर्ण सडकमा यात्रा गर्ने काम नगर्न सम्बन्धित निकायले आग्रह गरेको छ।
अहिलेको मुख्य सन्देश पनि यही हो—सडक खुलेको छ भन्दैमा जोखिम सकिएको छैन । लगातारको वर्षाका कारण पहिरो जुनसुकै बेला खस्न सक्छ । बाढीले सडकको अवस्था केही मिनेटमै परिवर्तन गर्न सक्छ । त्यसैले तपाईं पनि यीमध्ये कुनै राजमार्ग हुँदै यात्रा गर्ने तयारीमा हुनुहुन्छ भने पहिले सडकको अवस्था बुझ्नुहोस्, त्यसपछि मात्रै यात्रा तय गर्नुहोस् ।
