विराटनगर, पुस १८
भोलीदेखि विराटनगरमा प्रदेशस्तरीय प्रविधि मेला क्यान इन्फोटेक २०१९ सुरु हुँदैछ । विराटनगरस्थित जैन भवनमा आयोजना हुने इन्फोटेकको सम्पूर्ण तयारी पूरा भएको आयोजक समितिले मंगलबार पत्रकार सम्मेलनको आयोजना गरी जानकारी गराएको छ ।
पुस १९ देखि सुरु हुने इन्फोटेक २३ गतेसम्म सञ्चालन हुनेछ । इन्फोटकमा विभिन्न १ सय १० वटा स्टल रहने क्यान महासंघ मोरङका अध्यक्ष राजन यादवले जानकारी दिए । विराटनगरमा बृहत प्रविधि मेलाका रुपमा आयोजना गर्न लागिएको क्यान इन्फोटेकमा प्रविधि प्रदर्शनीका साथै सेमिनार, कन्फरेन्स स्मार्ट सिटी र साइबर सुरक्षाबारे समेत जानकारी गराइने जनाइएको छ ।
त्यसका लागि काठमाडौंलगायत विभिन्न विश्वविद्यालयका प्रविधिसम्बन्धी विशेषज्ञहरू सहभागी हुनेछन् । पाँच दिनसम्म सञ्चालन हुने क्यान इन्फोटेकमा विद्यार्थीलाई प्रवेश निःशुल्क गरिएको छ भने सर्वसाधारणलाई ५० रुपैयाँ प्रवेश शुल्क राखिएको छ ।
इन्फोटेकमा रोबो बार, पब्जी, स्मार्ट सिटी मोडेलिङ, ह्याकाथोन, भिडियो थिम च्यालेन्ज जस्ता युवा तथा विद्यार्थी लक्षित कार्यक्रम पनि मुख्य आकर्षण हुने आयोजकले जनाएको छ । इन्फोटेकमा २ लाख मानिसले अवलोकन गर्ने आयोजकले अपेक्षा राखेको छ ।
