किशोर विश्वकर्मा
विराटनगर, माघ १८
विराटनगरका उद्योगी चेतन निरौलाले आफ्नो जन्मदिनको अवसरमा आफु जन्मेर हुर्किएको गाउँमा पुगेर निशुल्क स्वास्थ्य शिविर र स्थानीय सामुदायिक विद्यालयमा अध्ययनरत विद्यार्थीहरुलाई स्कुल जुत्ता वितरण गरेका छन् ।
उनले आफ्नो ४४ औँ जन्मदिवसका अवसरमा लायन्स क्लब अफ विराटनगर यूनिक, लियो क्लब अफ विराटनगर यूनिक र विराट मेडिकल कलेजसँगको सहकार्यमा झापाको बुद्धशान्ति गाउँपालिका–७ स्थित राष्ट्रिय विजय माध्यामिक विद्यालयको प्राङ्गणमा निशुल्क स्वास्थ्य शिविर आयोजना गरेका हुन भने सोही विद्यालयमा अध्यनरत वालवालिकालाई स्कुल जुत्ता वितरण गरेका छन् ।
स्वास्थ्य शिविर उद्घाटन कार्यक्रममा उद्योगी निरौलाले बुद्धशान्ति गाउँपालिका–७ स्थित राष्ट्रिय विजय माध्यामिक विद्यालयमा अध्यनरत विद्यार्थीसहित अन्य दुई विद्यालयमा अध्ययनरत ४ सय विद्यार्थीलाई ४ सय जोर स्कुल जुत्ता वितरण गरेका हुन् ।
स्कुल जुत्ता नेपाल घरेलु तथा साना उद्योग महासंघ मोरङका महासचिव गोपाल काफ्ले, लायन्स क्लबका जोन चेयर पर्सन विनोद राउत, विराट व्यापार संघका महासचिव तथा लायन्स क्लब अफ विराटनगर यूनिकका प्रेसिडेन्ट सुजन थापा, लियो क्लब अफ विराटनगर यूनिकका फस्ट भाइस प्रेसिडेन्ट पेरिस सुवेदी, बुद्धशान्ति गाउँपालिका–७ का वडाध्यक्ष मात्रिका पौडेललगायतले वितरण गरेका थिए ।
सो अबसरमा बोल्दै उद्योगी निरौलाले २५ वर्ष अघि आफुले सोही विद्यालयमा अध्ययन गरेको स्मरण गर्दै सोही विद्यालयमा शिविर र स्कुल जुत्ता वितरण गर्न पाउँदा हर्षित भएको बताए ।
उनले संसारका जुनसुकै ठाउँमा पुगेपनि आफु मात्रृ भुमि बिसर्न नहुने बताए । कार्यक्रममा विद्यालयका प्राधानाध्यापक रामप्रसाद तिम्सिनाले आफ्ना विद्यार्थी निरौला सफल उद्यमी बनेर आफुले अध्ययन गरेको विद्यालयमा आई निशुल्क स्वास्थ्य शिविर र विद्यार्थीलाई स्कुल जुत्ता वितरण गरेको प्रति गौरव लागेको बताए । स्वास्थ्य शिविरमा बुद्धशान्ति गाउँपालिकाका २ सय ८ जनाले स्वास्थ्य परिक्षण गराएका छन् ।
शिविरमा स्त्री तथा प्रसुति, जेनरल फिजिसियन, नाक कान घाँटी, वालरोगलगायतको परिक्षण गरिएको निरौलाले जानकारी दिए । केही वर्ष विराटनगरको एक जुत्ता उद्योगका काम गरेर अनुभव बटुलेका निरौलाले पछि विराटनगरमा आफ्नै ग्यालेक्सी सुज उद्योग सञ्चालन गरे । निरौला नेपाल घरेलु तथा साना उद्योग महासंघ मोरङको प्रथम उपाध्यक्ष समेत हुन् ।
