विराटनगर, माघ १९
इटहरी उपमहानगर अन्तरगत खनार १३ स्थित कार्टुन फ्याक्ट्रि अगाडी मृत अवस्थामा फेला परेका स्थानीय ३५ बर्षिय श्याम सरदारको उनकै श्रीमतीले हत्या गरेको तथ्य सार्वजनिक भएको छ । परपुरूष संग अवैध सम्बन्ध बढेपछि श्रीमानले थाहा पाउने डरले प्रेमिसंग मिलेर ३२ बर्षिया श्रीमती देवकी सरदारले आफ्नै श्रीमानको निर्मम हत्या गरेको तथ्य खुलेको प्रहरीले जनाएको छ । श्रीमती समेतको संलग्नतामा श्याम सरदारको सुपारी दिई हत्या गरेको प्रहरीले जनाएको छ ।
गएको जेठ २ गते खनारस्थित कार्टुन फ्याक्ट्रि अगाडी सरदारको शव फेला परेको थियो । बैशाख ३१ गते बाट सम्पर्कबिहिन बनेका खनार निवासी ३५ बर्षिय श्याम सरदारको बिषयमा प्रहरीले खोजी गर्दा जेष्ठ २ मोटरसाइकलले थिचेको अवस्थामा उनको शव फेला परेको थियो । हत्या गरी मोटरसाइकल दुर्घटना भएको देखाउने प्रयास गरेपनि घटनाको प्रकृति शंकास्पद देखिएपछि प्रहरीले अनुशन्धान सुरू गरेको थियो ।
घटनाको बिषयलाई लिएर प्रहरीले उनकी श्रीमती ३२ बर्षिया देवकी सरदारलाई नियन्त्रणमा लिएपनि सुरूमा सफलता हात नपर्दा उनी त्यतिकै रिहा भएकी थिइन तर प्रहरीले केहि समयपछि आवश्यक प्रमाण जुटाएर पुन पक्राउ गरेपछि प्रेमि संग मिलेर श्रीमानको हत्या गरेका उनले स्विकारेको इलाका प्रहरी कार्यालय इटहरीका प्रहरी प्रमुख तथा डिएसपी शिवकुमार श्रेष्ठले बताए ।
श्रीमती देवकीकै बयानका आधारमा प्रहरीले सरदारको हत्यामा संलग्न उनका प्रेमी तथा मुख्य योजनाकार समेत रहेका सुनसरी दुहबी ९, छातावेली निवासी बर्ष ३९ का ताहीर मिया , हत्यामा संलग्न दुहबी ९ कै मोहम्मद जाविर हुसेनलाई पक्राउ गरी आवश्यक कानुनी कारवाही अघि बढाएको जनाएको छ । यस्तै हत्यामा संलग्न भारतको बिहार, गुडिया ग्राम पञ्चायत घर भई हाल दुहवी ८ बस्दै आएका ३१ बर्षिय रञ्जित महतो भने फरार रहेको र उनको खोजीकार्य भइरहेको इलाका प्रहरी कार्यालय इटहरीका डिएसपी श्रेष्ठले बताए ।
