विराटनगर, चैत १६
प्रदेश नम्बर १ का आन्तरिक मामिला तथा कानून मन्त्री हिक्मत कार्कीले असारसम्ममा लोकसेवा आयोगका आवश्यक कानून निर्माण गरी प्रदेशलाई चाहिने दक्ष कर्मचारी नियुक्त गरिने बताएका छन् ।
मन्त्री कार्कीले आवश्यक कर्मचारीको कमीले प्रदेशको विकास निर्माण कार्यमा गतिलिन नसकेको गुनासो गर्दैै प्रदेश लोकसेवा आयोग प्रमाणीकरण भैसकेका अवस्थामा अब कानुन निमार्ण गरी अघि बढ्ने बताए ।
लोकसेवा आयोग केन्द्रीय कार्यालयद्धारा आज विराटनगरमा आयोजित अप्राविधिक सेवातर्फका राजपत्र अनंकित तृतीय श्रेणी, शाखा अधिकृत वा सो सरहको पदको सक्षमता पहिचान कार्यशाला गोष्ठीमा बोल्दै उनले यस्तो बताएका हुन् ।
मन्त्री कार्कीले राज्यले कर्मचारीहरुलाई सेवासुविधा वृद्धि गरी उच्चतम प्रतिफल लिनु पर्ने पनि वताए । दक्ष र सक्षम कर्मचारी छनौटमा आवश्यक वैज्ञानिक विधि अपनाई उनीहरुको सहज जिवनयापनका लागि सुविधा वृद्धि गर्नुपर्नेमा उहाँले जोड दिए ।
उनले प्रदेश सरकारले आवश्यक दक्ष जनशक्ति छनौट गर्नका लागि केही निश्चित स्थानमा लोकसेवा आयोगको सहयोगमा विद्यालयस्तरमा तयारी कक्षा संचालन गर्ने योजना बनाईरहेको पनि जानकारी दिए ।
