वीरगंज, चैत १८
बारा र पर्सामा आइतबार आएको हावाहुरीका कारण घाइते भएकाहरुको उपचारको लागि रगत अभाव भएपछि नेपाली सेना र प्रहरी जवाहरुले रक्तदान गर्न थालेका छन् ।आईतबार राती एक्कासी हावाहुरी र असिना–पानीका कारण ठूलो संख्यामा घाइते भएपछि उपचारका लागि रगत अभाव भएको हो ।रातभरी उद्धारमा खटिएका सेना र प्रहरी जवानले घाइतेहरुका लागि रक्तदान गरेका हुन् ।
वीरगञ्ज अस्पतालमा घाइतेहरूको उपचारमा खटिएका चिकित्सकका अनुसार ब्लट बैंकमा ब्लट नभएको कारण बिरामीको उपचार रोकिएको छ। एबि पोजेटिभ, ओ पोजेटिभ, ए पोजेटिभ र ए नेगेटिभ रगतको अभाव भएको छ । प्रदेश नम्बर २ मा मुख्य न्यायाधीवक्ता दिपेन्द्र झाले ट्वीट गर्दै रगत अभावका भएकोले रक्तदान गर्न आह्वान गरेका छन् ।
आइतबार साँझ आएको भीषण हावाहुरीले अहिलेसम्म बारामा र पर्सामा गरी ३१ जनाको मृत्यु भईसकेको छ भने ४ सय जनाभन्दा बढी घाइते भएको जनाईएको छ । घाइतेहरुको उद्धार काम चलिरहेको छ ।
मृतकको संख्या बढ्न सक्ने प्रहरीले जनाएको छ । एक्कासी तीव्र गतिको हावा चलेकाले सर्वसाधरणको भागदौड मच्चिएको थियो । कतिपय घरमै बसेका व्यक्तिको समेत घर भत्किएर मृत्यु भएको प्रहरीले जनाएको छ । तराईका अन्य जिल्लामा पनि हावाहुरीबाट सर्वसाधरण प्रभावित भएपनि ठूलो क्षति नभएको प्रहरीले जनाएको छ ।
