भारतीय क्रिकेट टिमका अलराउण्डर केदार जाधवले फिटनेस पास गरेका छन् । आईपीएलका क्रममा घाइते भएका जाधबको मेडिकल रिपोर्ट सकारात्मक आएसँगै उनी २२ मे मा भारतीय टिमसँगै विश्वकप खेल्न इंग्ल्याण्ड जाने भएका हुन् । भारतीय टिमका फिजियो पेट्रिक फरहार्टले जाधवको मेडिकल रिपोर्ट बीसीसीआईलाई हस्तान्तरण गरिसकेका छन् । आईपीएलमा चेन्नई सुपरकिंग्सको अन्तिम खेलमा चौका बचाउन खोज्दा उनी चोटग्रस्त भएका थिए । अलराउण्डर जाधवले ५९ एक दिवसीय क्रिकेटमा ११ सय ७४ रन बनाएकमा छन् । जसमा २ शतक र पाँच अर्धशतक सामेल छन् । अफ स्पिन बलरसमेत रहेका जाधवले २७ विकेट लिइसकेका छन् ।
