७ असोज, काठमाडौं ।
पशु सेवा विभागले स्वच्छ मासुबारे जनचेतना जगाउन दशैंलाई लक्षित गर्दै ‘बधशालादेखि भान्सासम्म स्वस्थ र स्वच्छ मासु’ शीर्षकमा हालै सार्वजनिक गरेको पोस्टर विवादित बनेको छ ।
विभागले पोस्टरमा अन्य मासुजन्य पशुपंक्षीसंगै गाईको तस्वीर राखिएकाले विवाद चुलिएको हो । पोष्टरमा गाईको तस्वीर पनि राखेकोमा राष्ट्रिय प्रजातन्त्र पार्टीले आपत्ति जनाएको छ ।
दशैं लक्षित प्रचार सामाग्रीमा हिन्दुहरुको आस्था एवं गाईको तस्वीर संलग्न गरिनु दुर्भाग्यपूर्ण भएको उक्त पार्टीले जनाएको छ । प्रचार विभाग प्रमुख मोहन श्रेष्ठद्धारा जारी गरिएको विज्ञप्ति धार्मिक आस्थाजस्तो संवेदनशील विषयमा त्रुटि हुनु सामान्य विषयमात्र हुन नसक्ने बताइएको छ ।
राप्रपाले उक्त प्रचार सामाग्री संकलन, जफत र नष्ट गर्न पनि माग गरेको छ । विभागले पोस्टरमा मासुजन्य पदार्थको रुपमा खसी, बंगुर, भेडा, माछासँगै गाईको तस्वीर राखेको छ ।
यता विभागका प्रवक्ता डा.चन्द्र ढकालले बधशाला र मासु पसलमा वितरण गर्न बनाइएको ती पोष्टरबाट गाईको तस्वीर हटाउने तयारी भएको बताएका छन् । स्वच्छ मासुको प्रचारका लागि बनाएको पोस्टरमा गाईको तस्वीर परेकोमा पशु सेवा विभागले माफी मागेको छ ।
