२८ कार्तिक, काठमाडौं । संघीय समाजवादी पार्टी नेपालको संघीयपरिषद् बैठक बिहीबार काठमाडौंमा बस्दैछ । मध्यान्ह १२ बजेदेखि प्रज्ञा भवनमा सुरू बैठकमा संघीय समाजवादी फोरम र नयाँ शक्ति पार्टीबीच एकीकरण भएदेखि अहिलेसम्मको अवस्थाबारे समेटिएको प्रतिवेदन संघीय अध्यक्ष बाबुराम भट्टराईले पेश गर्दैछन् । परिषद बैठक बिहीबार नै सकिनेछ ।
समाजवादीले शुक्रबार र शनिबारका लागि केन्द्रीय परिषद बैठक डाकेको छ । परिषदका अध्यक्ष उपेन्द्र यादवको अध्यक्षतामा बस्ने बैठक मुख्यगरी दुइटा एजेन्डामा केन्द्रीत हुने समाजवादी पार्टीले जनाएको छ ।
राष्ट्रिय जनता पार्टी राजापासँग पार्टी एकीकरण र केपी शर्मा ओली नेतृत्वको सरकारबाट बाहिरिने वा सरकारमा निरन्तरता दिने भन्ने बिषय छलफलका एजेन्डा छन् । समाजवादीभित्र सरकारबाट बाहिरिनुपर्ने आवाज उठेको छ।
राजपाले पनि पार्टी एकीकरणका लागि पहिले सरकार छाड्न समाजवादीसँग माग राख्दै आएको छ । प्रधानमन्त्री ओली समाजवादीका अध्यक्ष यादवसँग रष्ट छन्। सरकारमा बसेर सरकारकै विरोध गरेको भन्दै यादवसँग ओली असंतुष्ट बनेका हुन्।
यादव उपप्रधान, स्वास्थ्य तथा जनसंख्या मन्त्री छन् । आफूले सम्हालेको मन्त्रालयमा पनि प्रभावकारी काम गर्न नसकेको भन्दै समाजवादीभित्र पनि सरकारबाट बाहिरिनुपर्ने आवाज उठ्दै आएको छ ।
