१७ मंसिर, काठमाडौं ।
१३ औं दक्षिण एसियाली खेलकुद साग अन्तर्गत बिशेष महत्वका साथ हेरिएको महिला भलिबलको फाइनल खेल आज हुँदैछ । आज नेपाली महिला भलिबल टोलीले स्वर्णको लागि सागमा सामेलमध्ये सबैभन्दा बलियो टिम भारतको सामना गर्नेछ । आजको फाइनल खेल दिउँसो ४ बजेपछि राष्ट्रिय खेलकुद परिषद (राखेप)को कभर्ड हल त्रिपुरेश्वरमा हुनेछ ।
भारत यो प्रतियोगितामा कुनै पनि देशसँग हार नबेहोरी फाइनल पुगेको टिम हो । सोही टिमसँग नेपालले आज स्वर्णका लागि भिड्दैछ । भारतले सागमा ‘महिला भलिबल’ विधा समावेश भएदेखि नै स्वर्ण जित्दै आएको छ । सधैँ भारतको छाँयामा पर्ने गरेको नेपालले भने कास्यमा मात्रै चित्त बुझाउनु परेको सागको इतिहास छ । यसपटकको फाइनल नेपाली टोलीका लागि घरेलु मैदानमै हुँदैछ ।
सागको १३ औं श्रृंखलाको फाइनल आइपुग्न भारतले शनिबार सेमिफाइनमा माल्दिभ्सलाई ३–० को सोझो सेटमै पराजित गरेको थियो । उसले पहिलो सेटमा २५÷१४, दोस्रो सेटमा २५÷६ र तेस्रो सेटमा २५÷१७ ले माल्दिभ्सलाई पराजित गर्दै सहज जीत निकालेको थियो ।
यता नेपालले पनि गत शनिबार नै भएको सेमिफाइनलमा श्रीलंकालाई ३–० को सोझो सेटमै पराजित गरेर फाईनलको यात्रा तय गरेको थियो । श्रीलंकामाथिको जीतमा नेपालले पहिलो सेटमा २५÷१४, दोस्रो सेटमा २५÷१८ र अन्तिम सेटमा २५÷२१ को जित निकाल्न सफल भएको थियो ।
नेपाल र भातको भेट यही श्रृंखलामा नभएको भने होइन । यसअघि समूह चरणको खेलमा भारत र नेपालको भेट भइसकेको छ । सो खेलमा भारतले नेपाललाई ३–० को सोझो सेटमा पराजित गरेको थियो ।
धेरैले महत्वका साथ हेरेको यो प्रतिस्पर्धामा भारतलाई जित्दै नेपालले आज नयाँ इतिहाँस रच्न चाहन्छ । उता भारत पनि उच्च मनोबलका साथ पुरानै इतिहाास दोर्हायाउने पक्षमा छ । नेपालका लागि साग महिला भलिबलमा फाइनल खेल यो नै पहिलो हो । यसअघि नेपालले साग महिला भलिबलमा सन् १९९९, २००६ र २०१६ मा कास्यमै चित्त बुझाउनु परेको थियो ।
