१८ मंसिर, नयाँदिल्ली । चीनका विदेशमन्त्री वाङ यीले यही डिसेम्बर महिनामा भारतको भ्रमण गर्ने भएका छन् ।
दुई पक्षका बीचमा भ्रमणबारे आन्तरिकरुपमा तयारीहरु भइरहेकाले उनको भ्रमण यही महिनाको अन्त्यतिर हुने सम्भावना रहेको अधिकारीहरुले जनाएका छन् ।
स्रोतले दिएको जानकारीअनुसार दुई देशको सिमानाका विषयमा छलफल गर्न उनी भारत आउन लागेका हुन् । चिनियाँ विदेशमन्त्री वाङले भारतका राष्ट्रिय सुरक्षा सल्लाहकार अजित डोभलसँग पनि भ्रमणका क्रममा भेटवार्ता गर्ने जनाइएको छ ।
सन् २०१७ मा दोक्लामको विषयलाई लिएर भारत र चीनबीच विवाद बढेको थियो । यसले नयाँदिल्ली र बेइजिङबीचको सम्बन्धमा चिसोपना बढाएको थियो ।
भारतीय प्रधानमन्त्री नरेन्द्र मोदी र चिनियाँ राष्ट्रपति सी चिनफिङका बीचमा गत अक्टोबरमा महाबलिपुरममा भएको अनौपचारिक भेटवार्तापछि अहिले सबैभन्दा उच्चस्तरको चिनियाँ भ्रमण हुन लागेको हो । (रासस)
