३ पौष, रुकुम पश्चिम । आठबीसकोट नगरपालिकाका निमित्त प्रमुख प्रशासकीय अधिकृतमाथि आक्रमण भएको छ ।
बुधबार बेलुका ६ बजे कार्यालयको काम सकेर फर्किँदै गर्दा निमित्त प्रमुख प्रशासकीय अधिकृत रामबहादुर के.सी.माथि कार्यालय नजिकैको राडी बजारमा आक्रमण भएको हो ।
आक्रमणमा परी केसीको टाउकामा ४ वटा टाँका लगाइएको छ । उनीसँगै रहेका सूचना प्रविधि अधिकृत गणेश चन्दमाथि पनि आक्रमण भएको छ ।
आक्रमण आठबीसकोट नगरपालिका ३ का गोपाल वि.क.ले गरेको बताइएको छ । गोपाल वडा नम्बर ३ का वडाध्यक्ष केशरमान वि.क.का भाइ हुन् । उनको खोजी कार्य जारी छ ।
आठबीसकोट नगरपालिकाका उपप्रमुख गीता नेपालीले विज्ञप्ति जारी गर्दै निमित्त प्रमुख प्रशासकीय अधिकृत केसीमाथि भएको आक्रमणको भत्र्सना गरेकी छन् । विज्ञप्ति जारी गर्दै उपप्रमुख नेपालीले दोषीमाथि कारबाहीको माग गरेकी छन् । दुई तीन दिनदेखि गोपाल वि.क.ले पिछा गरेर केसीमाथि आक्रमण गरेको विज्ञप्तिमा उल्लेख गरिएको छ ।
यता नगरपालिकामा कार्यरत कर्मचारीले छुट्टै विज्ञप्ति जारी गरी वडा नम्बर ३ का अध्यक्षको योजनालाई लिएर कार्यकारी अधिकृतमाथि आक्रमण भएको बताएका छन् । दोषीमाथि कारबाहीको माग गर्दै कारबाही नभएसम्मका लागि बिहीबारदेखि नगरपालिकाको कुनै पनि काम नगर्ने भन्दै विज्ञप्तिमार्फत् चेतावनी दिइएको छ ।
सोधपुछका लागि भनेर वडाध्यक्ष केशरमान विकलाई प्रहरीले नियन्त्रणमा लिएको जनाएको छ । टाउकामा चोट लागेका केसीलाई थप उपचारका लागि जिल्ला अस्पताल ल्याउने तयारी गरिएको प्रहरीले जनाएको छ ।
