२६ पुस, विराटनगर ।
प्रदेश राजधानी रहेको विराटनगरको पहिचानसँग जोडिएको एक सिंघिया खोलाको संरक्षण, सम्वद्र्धन र उपयोगका लागि प्रदेश १ सरकारले दीर्घकालीन योजना बनाएर काम सुरु गरेको छ । यसैक्रममा विराटनगरको उत्तरी सिमास्थित घिनाघाट जोड्ने सिंघीया खोलाको पुल उत्तरतर्फ भईरहेको सिंघीया खोलाको वहाव नियन्त्रणको कामको प्रदेश १ का सामाजिक विकास मन्त्री जीवन घिमिरेले निरीक्षण गरेका छन् ।
प्रदेश सरकार अन्तर्गत बजेट विनियोजन भई खोला नियन्त्रण र पानी व्यवस्थापनका लागि काम भईरहेको स्थानको शनिबार बिहान मन्त्री घिमिरेले स्थलगत निरीक्षण गरेका हुन् । निरीक्षणका क्रममा मन्त्री घिमिरेले भईरहेको कामको अवलोकन प्रगतिका साथै कामको बारेमा चासो राखेका छन् । प्रदेश सरकारले सञ्चालन गरेको सिंघीया नदी संरक्षण अभियान अन्र्तगत सफाई अभियान सुरु भएपनि संरक्षण, सम्वद्र्धन र उपयोगका लागि विस्तृत परियोजना बनाएर प्रदेश राजधानीबासीको पहिचानको रुपमा खोलाको विकास गरिने मन्त्री घिमिरेले बताए । उनले उत्तर तर्फ खाली रहेको जग्गाबाट सुरु भएको नदी नियन्त्रण र पानी व्यवस्थापनको काम दक्षिणमा भाथीगञ्ज जाने पुलसम्म गरिने जानकारी दिए । छुट्टाछुट्टै काम गर्दा कामको गुणस्तर सही आउन नसकेकोले प्रदेश सरकारले सिंघिया खोलासँग जोडिएका पाँच पालिकासँग मिलेर एकीकृत हिसाबले काम थालेको उनको भनाई छ ।
सिभिल इन्जिनियरिङ माध्यामबाट नदी नियन्त्रण र पानी व्यवस्थापनको काम भईरहेको जलस्रोत तथा सिंचाइँ विभागका डिभिजन प्रमुख आनन्दकुमार झाले जानकारी दिए । कात्तिकबाट सुरु भएको काम तीव्र गतिमा चलिरहेको उनले बताए । बजेट व्यवस्था भए २४ महिनाको ठेक्का अवधि रहेको काम यसै वर्षमै सम्पन्न हुने उनको भनाई छ ।
सिघियाको संरक्षण, सम्वद्र्धन र उपयोगको योजनाका लागि २ करोड ६३ लाखमा गजुरमुखि निर्माण सेवासँग गत साउनमा ठेक्का सम्झौता भएको थियो । प्रदेश सरकारले यस योजनाका लागि चालु आर्थिक वर्षमा ८० लाख बजेट विनियोजन गरेको छ ।
