एजेन्सी, माघ १
बार्सिलोनाका कप्तान लिओनेल मेस्सीले क्रिस्टियानो रोनाल्डो ला लिगामा खेल्दा दुई खेलाडी बीचको प्रतिस्पर्धा सधैंभर दर्शकहरुमाझ ताजा नै रहने बताएका छन् । रोनाल्डो हाल इटालियन लिगमा खेलेपनि दुई बीचको प्रतिस्पर्धा बिर्सन नसकिने मेस्सीले बताएका हुन् ।
मेस्सीले रोनाल्डोसँगको प्रतिस्पर्धा लामो समय चलेको र उच्च बिन्दुमा प्रतिस्पर्धा हुनुले पनि समर्थकहरुलाई बिर्सन कठिन हुने बताए । उनले रोनाल्डो इटालियन लिगमा गएपनि प्रतिस्पर्धा अझै ताजा रहेको अभिव्यक्ति दिए । मेस्सीले डीएजेडएनसँग बोल्दै भने ‘ यो प्रतिस्पर्धा निकै विशेष थियो । र, सधैंभर यादगार नै रहनेछ । यति लामो समयसम्म उच्च विन्दुमा रहेर प्रतिस्पर्धा गर्नु निकै कठिन थियो । र हामी जुन टोलीमा खेल्यौं दुवै टोलीले हामीबाट सधैं उत्कृष्ट नै अपेक्षा गरिरह्यो । विश्वको दुई उत्कृष्ट टोलीमा खेल्नुले पनि हामीलाई सहयोग गर्यो ’।
रोनाल्डो र मेस्सीले सन् २००९ देखि २०१८ सम्म स्पेनिस ला लिगमा एक अर्कासँग नियमित प्रतिस्पर्धा गरेका थिए । चिर परिचित प्रतिद्वन्द्वी रियल म्याड्रिड र बार्सिलोनाबाट खेल्नुले पनि यी दुईको प्रतिस्पर्धामा थप रोमान्चक भएको थियो । मैदानमा यी दुई खेलाडीले लगातार प्रतिस्पर्धा गर्दै पछिल्लो दशक विश्व फुटबलमा वर्चस्व नै कायम गरे ।
यसक्रममा रोनाल्डो र मेस्सीले पछिल्लो १२ वर्षमा ११ पटक ब्यालोन डी’ओर अवार्ड जिते । सन् २०१९ मा मेस्सीले उपाधि जित्दै यी दुईको वर्चस्व केहि हदसम्म कम गरे । मेस्सीले ४ वर्षको अन्तरलपछि सन् २०१९ मा आफ्नो छैटौं ब्यालोन डी’ओर उपाधि जिते । उनले यससँगै ५ पटक सो उपाधि जितेका रोनाल्डोलाई उछिने । रोनाल्डो ला लिगामा खेलेको समयमा उनले ४ सय ३८ खेलमा ४ सय ५० गोल गरे । ठिक यस समयमा मेस्सीले भने ४ सय ७८ खेल खेल्दै ४ सय ७२ गोल गर्न सफल रहे ।
मेस्सीले रोनाल्डो रियल म्याड्रिडबाट खेल्दा एल क्लासिको पनि विशेष रहने गरेको बताए । उनले रोनाल्डो रियलबाट खेलेको कारण नै त्यस समय एल क्लासिकोले बढी महत्त्व पाएको अभिव्यक्ति दिए ।
