२ माघ, दुबई ।
अलराउण्डर बेन स्टोक्स वर्ष खेलाडी भएका छन् । अन्तर्राष्ट्रिय क्रिकेट काउन्सिल (आईसीसी) ले बुधबार बेन स्टोक्सलाई वर्ष खेलाडी घोषणा गरेको हो । स्टोक्सले अवार्ड पाउनु उपलब्धि भएको बताएका छन् । उनले भने, ‘आफ्नो कामको सम्मान हुनु र यो अवार्ड पाउनु वास्तवमै खुसीको उपलब्धि हो ।’
सन् २०१९ स्टोक्सका लागि अविस्मरणीय रह्यो । यसक्रममा यी इंग्लिस अलराउन्डरले एकदिवसीय विश्वकप उपाधिका लागि निर्णायक प्रदर्शन गरेका थिए । सर ग्यारी सोबर्स ट्रफीका लागि स्टोक्स निर्विवाद रोजाइ रहे । उनले न्युजिल्यान्डविरुद्ध जुलाईमा भएको नाटकीय फाइनलमा नटआउट ८४ रन बनाएका थिए । यसको ६ सातापछि अस्ट्रेलियाविरुद्धको तेस्रो एसेज टेस्टमा उनले इंग्ल्यान्डलाई जित दिलाउन लिड्समा उत्कृष्ट १ सय ३५ रनको नटआउट इनिङ्स पनि खेले । अवार्ड पाउने भएपछि २८ वर्षीय स्टोक्सले यसलाई ठूलो उपलब्धि माने ।
एक वर्षे अवधिमा स्टोक्सले २० एकदिवसीयमा ७ सय १९ रन बनाएका छन् भने १२ विकेट हात पारे । ११ टेस्टमा उनले ८ सय २१ रन बटुले र २२ विकेट आफ्नो नाममा लेखाए । भारतका प्रारम्भिक ब्याट्सम्यान रोहित शर्मा एकदिवसीय वर्षका खेलाडी चुनिए ।
भारतीय कप्तान विराट कोहलीले ‘स्प्रिट अफ क्रिकेट’ अवार्ड पाए । विश्वकपमा क्रममा अस्ट्रेलियाका स्टिभ स्मिथविरुद्ध आक्रोश पोखिरहेका आफ्ना समर्थकलाई कोहलीले रोक्न भनेका थिए । बल टेम्परिङ काण्डमा फसेका स्मिथ एक वर्षको प्रतिबन्धपछि अन्तर्राष्ट्रिय क्रिकेटमा फर्किरहेका थिए । ‘यो अवार्ड पाएर म आश्चर्यमा छु,’ कोहलीले भनेका छन् ।
उनी आईसीसीको टेस्ट र एकदिवसीय टिमको कप्तान पनि चुनिए । यस्तै अरू प्रमुख अवार्डमध्ये अस्ट्रेलियाका तीव्र गतिका बलर प्याट कमिन्स वर्षका टेस्ट खेलाडी र उनकै युवा साथी मार्नस लबसचेन उदीयमान खेलाडी घोषित भए ।
