२३ माघ, एजेन्सी । टर्कीको राजधानी इस्तानबुलमा अवतरण गर्ने क्रममा एक यात्रुबाहक विमान धावनमार्गमा चिप्लिएर तीन टुक्रा भएको छ । घटनामा तीन जनाको मृत्यु हुनुका साथै १ सय ७९ जना घाइते भएका छन् ।
द पेगासस एयरलाइन्सको सो विमानमा १७१ यात्रु र चालकदलका ६ जना सदस्य सवार थिए । देशको पश्चिममा रहेको इजमिर प्रान्तबाट आएको सो विमान सबिहा गोकसेन विमानस्थलमा दुर्घटनाग्रस्त भएको हो ।
बोइङ ७२७ विमान भारी हावा र वर्षाकाबीच विमानस्थलमा अवतरण हुने प्रयासमा थियो । घटनापछि विमानस्थल बन्द गरेर अन्य उडानहरूलाई अन्यत्र मोडिएको थियो । टर्कीका संचारमाध्यमका अनुसार विमानमा सवार अधिकाशं यात्री टर्किस नागरिक हुन् भने २० जना विदेशी नागरिक रहेका थिए । स्तानबुलका गभर्नर अलि एरलिकायाका अनुसार विमान धावनमार्गबाहिर करिब ३०/४० मिटरसम्म चिप्लिएको थियो ।
यसैगरी त्यहाँ स्वास्थ्यमन्त्री फाहरेट्टिन कोकाले घटनामा ३ जनाको मृत्यु भएको र १७९ जना घाइते भएको पुष्टि गरेका छन् । उनले घटनामा घाइते भएको केहीको अवस्था गम्भीर रहेको पनि बताए । घटनाको जाँच सुरू भएको छ । यस एयरलाइन्सका जहाज यसअघि पनि धावनमार्गमा चिप्लिने गरेका घटना छन् । यसै वर्षपनि जनवरीमा यही कम्पनीको जहाज चिप्लिएको थियो भने गत वर्ष पनि जहाज चिप्लियर झण्डे समुन्द्रमा घसेको थियो ।
