२७ माघ, काठमाडौं ।
पूर्वसचिव अर्जुन कार्कीकी श्रीमती मुना कार्कीको हत्यामा कामदारकै संलग्नता रहेको प्रहरीले निष्कर्ष निकालेको छ । ललितपुरको सानेपास्थित कार्कीको निवासमा जडान गरिएको सीसीटीभीको फुटेज हेरेर पत्नी मुना कार्कीको हत्यामा कामदारकै संलग्नता रहेको निष्कर्ष निकालेको हो ।
भान्छा छेऊ रहेको क्लोज सर्किट (सीसीं) क्यामराको दृश्यमा कार्कीको घरमा कार्यरत कामदार २२ वर्षीय विजय चौधरीले मुनालाई घाँटीमा समातेर घिसार्दै लगेको देखिएको अनुसन्धानमा संलग्न प्रहरी अधिकृतले जानकारी दिए । फुटेजमा चौधरीले मुनालाई आक्रमण गरेको देखिएको पुष्टि गरेका छन् ।चौधरीले मुनाको हत्यापछि झुण्डिएर आत्महत्या गरेको प्रहरीको भनाइ छ ।
अपराधस्थलमा खटिएका ललितपुर प्रहरी परिसर जावलाखेलका एक अनुसन्धान अधिकृतका अनुसार भान्सामा रहेको पिर्का प्रहार गरेर कामदारले हत्या गरेको हुन सक्ने आशंका प्रारम्भमै गरिएको थियो । उनका अनुसार यो दृश्य बिहान ९ बजेको हो ।
यद्यपि, दुईबीच के रिसिइबी थियो भन्ने खुलिसकेको छैन । प्रहरीले हत्याको कारण खोज्दै विभिन्न व्यक्तिसँग वयान लिने क्रम जारी राखेको जनाएको छ ।
प्रहरीका अनुसार घटना हुँदा पूर्वसचिव कार्की घरमा थिएनन् । उनी बिहानजै उठेर पशुपतिनाथको दर्शन गर्न गएका थिए । फर्किएर आउँदा उनले श्रीमती मुनालाई अचेत अवस्थामा फेला पारेर प्रहरीलाई खबर गरेका थिए । लगत्तै उद्धार गरेर स्टार हस्पिटल पुर्याइए पनि चिकित्सकले मृत घोषित गरेको थियो । अपराधस्थलमा फरेन्सिक विज्ञको टोलीले पनि अनुसन्धान गरिरहेको छ ।
