१२ फागुन, चितवन । माडी नगरपालिका–१ का वडाध्यक्ष कृष्ण पौडेल ६ दिनदेखि आमरण अनशनरत रहेको र स्वास्थ्य अवस्था गम्भिर बन्दै गएपछि पौडेललाई भरतपुर अस्पतालमा भर्ना गरिएको छ ।
विभिन्न माग राख्दै उनी फागुन ७ गतेदेखि अनशनरत थिए । अनशनका क्रममा उनको स्वास्थ्य जटिल बन्दै गएपछि आइतबार भरतपुर अस्पतालका मेडिकल सुपरिटेण्डेण्ट डा श्रीराम तिवारीसहितको टोलीले परीक्षण गरेको थियो ।
परीक्षणका क्रममा उनको शरिरमा अक्सिजनको मात्रा घट्दै गएको र मुटुको चाल बढ्दै गएको देखिएको थियो । वडाध्यक्ष पौडेलको स्वास्थ्य गम्भीर बनेपछि बिहान भरतपुर अस्पतालमा ल्याइ सघन उपचार कक्षमा उपचार भइरहेको डा तिवारीले जानकारी दिए ।
यसैबीच अनशनरत पौडेलको माग सुनुवाइ नभएको भन्दै स्थानीयले सोमबार माडी बन्द गराएका छन् । माडी हुँदै सदरमुकाम चल्ने सवारीसाधन र बजार ठप्प भएको छ ।
राष्ट्रिय निकुञ्ज तथा वन्यजन्तु संरक्षण (पाँचौँ संशोधन) नियमावली २०७६ पुनः संशोधन हुनुपर्ने, बाँदरझुला साथै अमिलियाको उचित व्यवस्था गरिनुपर्ने, मानव वन्यजन्तु द्वन्द्व निवारणमा वन र बस्तीबीच वैज्ञानिक संरचना बनाउनुपर्ने र उत्तरी सिमानामा पर्ने रिउ खोला कोरिडोरको निर्माण व्यवस्थित गरिनुपर्ने पौडेलका माग छन् ।
यस्तै लागत तथा उत्पादनको आधारमा बालीको क्षतीपूर्तिको व्यवस्था गरिनुपर्ने, कसरादेखि वनकट्टा साथै बगहीदेखि बाँदरझुलासम्म बाटो पूर्णरुपमा स्तरोन्नति गरी चौबिसै घण्टा आवतजावतको व्यवस्था गरिनुपर्ने, माडी नगरपालिकालाई कृषि, पर्यटनको केन्द्रका रुपमा विकास गर्न विशेष योजना ल्याइनुपर्ने, प्राकृतिक स्रोत साधनमा पूर्णरुपमा स्थानीय निकायको अधिकार हुनुपर्ने माग राख्दै वडाध्यक्ष पौडेल अनसनमा बसेका छन् ।
