१९ फागुन, काठमाडौँ । भारतीय प्रधानमन्त्री नरेन्द्र मोदीले प्रधानमन्त्री केपी शर्मा ओलीको सफल मिर्गौला प्रत्यारोपणको कामना गरेका छन् । सोमबार बिहान भारतीय प्रधानमन्त्री मोदीले ट्वीट गर्दै सफल शल्यक्रिया र साथै शिघ्र स्वास्थ्यलाभको कामना गरेका हुन् ।
प्रधानमन्त्री केपी शर्मा ओलीको दोस्रो पटकको मिर्गौला प्रत्यारोपण त्रिवि शिक्षण अस्पतालमा बुधबार गर्ने तयारी भएको छ । प्रधानमन्त्रीको मिर्गौला प्रत्यारोपणका लागि अस्पतालका विशेषज्ञहरूको सोमबार विशेष बैठक हुने एक चिकित्सकले बताए ।
प्रत्यारोपणकै तयारीका सिलसिलामा आइतबार बिहान ग्रान्डी हस्पिटलमा ओलीको ‘कोलोनोस्कोपी’ गरिएको थियो । गत शनिबार शिक्षण अस्पतालमा प्रत्यारोपण अगाडि आवश्यक पर्ने रगतलगायत विभिन्न परीक्षणहरू गरिएको थियो ।
१२ दिनअघि मनमोहन कार्डियोथोरासिक भास्कुलर एन्ड ट्रान्सप्लान्ट सेन्टरमा ओलीको एन्जियोग्राफी गरिएको थियो । १९ दिनअघि ग्रान्डीमै ‘बोन डेन्सिटी (हाडको घनत्व परीक्षण) र ‘सिटिस्क्यान’ गरिएको थियो ।
सबै कुरा सामान्य रूपले हुँदै गए मिर्गौला प्रत्यारोपणका लागि प्रधानमन्त्रीलाई करिब ५ दिन अस्पतालमा राख्ने तयारी छ । कुनै जटिल स्थिति नहुँदा शिक्षण अस्पतालबाट सामान्यतया ४–५ दिनमै मिर्गौला प्रत्यारोपण गरिएका बिरामीहरूलाई डिस्चार्ज गरिन्छ । विशेष परिस्थितिमा प्रत्यारोपण डेढ महिनासम्म बस्नुपरेको इतिहास छ ।
