२४ चैत, काठमाडौं । नेपाल पत्रकार महासङ्घले कोभिड-१९ नियन्त्रणमा महत्वपूर्ण दायित्व पूरा गर्न सिङ्गो सञ्चार क्षेत्रलाई अपिल गरेको छ ।
महासङ्घका अध्यक्ष गोविन्द आचार्यले प्रेस विज्ञप्ति निकालेर कोभिड-१९ नियन्त्रणमा सञ्चार क्षेत्रलाई संयोजन र समन्वय गर्न लागि महासङ्घ केन्द्रीय समिति मातहतका सबै तहलाई आग्रह गरेका हुन् ।
महासङ्घले कोरोना नियन्त्रणमा तीनवटै तहका सरकार, राज्यका सबै निकाय, सबै राजनीतिक दल, नागरिक सङ्घसंस्था, पेशाकर्मी, व्यवसायीलाई एउटै मिसनमा लाग्न आह्वान गरेको छ ।
जटिल अवस्थामा पनि अनेकौँ समस्यासँग जुधेर आफूलाई निरन्तरता दिइ जोखिम मोलेर सूचना तथा समाचार सामग्री प्रवाह गरिरहेका सञ्चारमाध्यमको हकमा प्याकेजमै योजना बनाएर प्रोत्साहन गर्न महासंघको आग्रह छ ।
सबै सञ्चारमाध्यमबाट कोरोना सङ्क्रमण हुन नदिन जनचेतनामूलक सन्देश र सूचना प्रवाहका लागि सहकार्य गर्नुपर्नेमा पनि महासङ्घको जोड छ ।
अफवाह फैलन नदिन तथा कसैले अफवाह फैलाएमा त्यसलाई तत्काल रोक्नका लागि र पुष्टि भएका एवं तथ्यमा आधारित समाचार सामग्री मात्र प्रवाह गर्न महासंघको आग्रह छ । (रासस)
