२४ चैत, काठमाडौं । सरकारले मुलुकभर लागू गरेको लक डाउनलाई कडा पार्ने निर्णय गरेपछि सशस्त्र प्रहरी बलले भारतसंग सीमा जोडिएको क्षेत्रमा थप २ हजार २ सय ८० थप जनशक्तिलाई खटाउने भएको छ । सीमा क्षेत्रमा हुने घुसपैठलाई नियन्त्रण गर्न उक्त जनशक्ति खटाउन लागेको हो ।
सो बलले संबेदनशील क्षेत्रमा अस्थायी पोष्ट निर्माण गरेर थप जनशक्ति परिचालन गर्न लागेको बलका प्रवक्ता सशस्त्र प्रहरी नायव महानिरीक्षक प्रविण श्रेष्ठले जानकारी दिए । उनका अनुसार अहिले तालिम केन्द्र, बाहिनी र शिक्षालयमा रहेका जनशक्तिलाई सीमा क्षेत्रमा खटाईने र नेपाल तथा भारत तर्फबाट हुने आवत जावतलाई नियन्त्रण गर्ने उदेश्य अनुसार काम भइरहेको छ ।
कोरोना भाइरसको संक्रमणका कारण मुलुकभर लक डाउन गर्दापनि भारतबाट नेपाल तर्फ आउने क्रम नरोकिएपछि सरकारले नाकामा कडाई गर्नकालागि सशस्त्र प्रहरी बललाई सीमा क्ष्ँोत्रमा परिचालन गर्ने निर्णय गरेको थियो ।
सोही अनुरुप अहिले सशस्त्र प्रहरी बलका आईजीपी शैलेन्द्र खनालले बाहिनीहरुलाई तत्कालै उक्त निर्णय कार्यान्वयन गराउन निर्देशन दिएपछि बाहिनीहरुले आफ्नो कार्यक्षेत्रमा पर्ने सीमा क्षेत्रका संवेदनशील क्षेत्रको पहिचान गरी थप जनशक्ति परिचालन गर्ने कामलाई तीव्रता दिएको छ ।
सरकारले लक डाउनलाई अझै एक हप्ता बढाउने तयारी गरेपछि भारतीय सीमा क्षेत्रमा कडाई गर्ने तयारी गरेको हो । यता सशस्त्र प्रहरी बलका १ सय २० जना कर्मचारीलाई क्वारेन्टाइनमा राखेको पनि प्रवक्ता श्रेष्ठले जानकारी दिए । उनका अनुसार लामो बिदामा गएर कार्यालय फर्केका, बिदेशबाट नेपाल आएका आफन्तलाई लिन गएका सशस्त्र प्रहरी कर्मचारी र सुदुरपश्चिम प्रदेशमा भारतबाट नेपाल प्रवेश गरेका नेपालीलाई ब्यवस्थापन गर्ने काममा खटिएका सशस्त्र प्रहरी कर्मचारीलाई समेत क्वारेन्टाईनमा राखिएको छ ।
सशस्त्र प्रहरीका ९६ जनालाई सुदुरपश्चिम प्रदेश अन्र्तगत पर्ने बिभिन्न कार्यालयमा क्वारेन्टाइनमा राखिएको छ भने प्रदेश नम्वर १ अन्र्तगत १७ जना, प्रदेश नम्वर २ मा २ जना, प्रदेश नम्वर ३ मा ५ जना र प्रदेश नम्वर ६ मा १ जनालाई क्वारेन्टाईनमा राखिएको पनि उनले जानकारी दिए । (रासस)
