२६ चैत, एजेन्सी । कोभिड–१९ को संक्रमणका कारण अमेरिकामा मंगलबार मात्रै एक हजार ८ सयभन्दा बढीको मृत्यु भएको छ । अमेरिकामा कोरोना भाइरस संक्रमणको पुष्टि भएयता एकैदिन सबैभन्दा बढीको मृत्यु भएको हो ।
बुधबारसम्म अमेरिकामा कोरोना भाइसको संक्रमणबाट मृत्यु हुनेको संख्या १२ हजार ९ सय १० पुगेको छ । त्यस्तै अमेरिकामा कोरोना भाइरसबाट संक्रमित हुनेको संख्या करिब ४ लाख पुगेको छ । बुधबार बिहानसम्म अमेरिकामा कोरोना भाइरसबाट संक्रमित हुनेको संख्या ३ लाख ९९ हजार ९ सय २९ रहेको छ भने तीमध्ये करिब २२ हजार निको भएका छन् ।
अमेरिकामा कोरोना भाइरसको संक्रमणबाट सबैभन्दा बढी प्रभावित न्युयोर्क भएको छ । पछिल्लो २४ घण्टामा न्युयोर्कमा मात्रै ७३१ जनाको मृत्यु भएको छ । बुधबारसम्म कोरोना भाइरसको संक्रमणबाट न्युयोर्कमा मात्रै मृत्यु हुनेको संख्या ५ हजार ४ सय ९८ पुगेको छ । न्युयोर्कका गभर्नर एन्ड्रयु कुमोले न्युयोर्कका बासिन्दालाई घरभित्रै बस्न आग्रह गरेका छन् ।
अमेरिकामा संक्रमण दिनप्रतिदिन बढ्दै जाँदा राष्ट्रपति डोनाल्ड ट्रम्प भने विश्व स्वास्थ्य संगठन(डब्लूएचओ) प्रति आक्रोशित बनेका छन् । उनले डब्लूएचओलाई अमेरिकाले उपल्बध गराउँदै आएको रकम पनि रोक्ने चेतावनी दिएका छन् ।
डब्लूएचओले अमेरिकालाई गलत सुझाव दिएका कारण नै संक्रमणले महामारीको रुप लिएको राष्ट्रपति ट्रम्पको आरोप छ । ट्रम्पले अमेरिकामा राष्ट्रिय आपत्काल घोषणा गर्नुअघि नै डब्लूएचओले कोरोना संक्रमण फैलिँदै गएको भन्दै विश्वव्यापी स्वास्थ्य संकटकालको घोषणा गरेको थियो ।
