१ वैशाख, सप्तरी ।
सप्तरीमा लकडाउन उल्लंघनका विषयमा प्रहरीसँगको बादविवादका क्रममा बेहोस भएर एक जना बृद्वाको मृत्यु भएको छ । खड्क नगरपालिका–६ वीरपुरमा सोमबार बिहान प्रहरीले बस्तीमा देखिएको भीडभाड हटाउने क्रममा भएको विवादका क्रममा ६५ की जैनवखातुन (पुजर्नी) सडकमै बेहोस भएर ढलेकी थिइन।
बेहोस भएकी उनलाई स्थानीय अस्पतालमा प्राथमिक उपचार गराई थप उपचारका लागि गजेन्द्रनारायण सिंह सगरमाथा अंचल अस्पतालमा ल्याउने वित्तिकै उनको मृत्यु भएको प्रहरीले जनाएको छ । उनी मुटुका रोगी भएको जनाईएको छ । लकडाउन उल्घंघन गरेर सर्वसाधारण बाहिर निस्केको सूचना पाएर पुगेको इलाका प्रहरी कार्यालय कल्याणपुरको टोलीसँग स्थानीय वासिन्दाको विवाद भएको थियो ।
सर्वसाधारणले काम नगरे खाना सरकारले दिनुर्पयो भनेर वादविवाद गरेको र त्यही विवादका क्रममा खातुन बेहोस भएको सप्तरीका प्रहरी प्रवक्ता एवं डीएसपी तिलक भारतीले जानकारी दिए ।
प्रहरीले आफैं बेहोस भएको बताएपनि स्थानीयले लक डाउन उल्लंघन रोक्न गएको प्रहरीले उनलाई कुटेपछि उनी बेहोस भएको जनाएका छन् । स्थानीयले जयनवका पति हाजी कमरुद्धिन ट्याक्टरमा सामान लोड गरिरहँदा दुवै जनालाई कुटेको बताएका छन् । खातुनको शव पोस्टमार्टमका लागि राजविराजस्थित गजेन्द्रनारायण सिंह अस्पतालमा लगिएको तथा घटनाबारे बुझिरहेको डीएसपी भारतीले बताए।
