९ बैशाख, काठमाडौँ ।
उदयपुरका ८ जनामा कोरोना भाइरस संक्रमण पुष्टि भएको छ । योसँगै नेपालमा कोरोना भाइरस संक्रमितको संख्या ४० पुगेको छ ।
उदयपुरको भुल्केस्थित एक मस्जिदमा रहेका १३ जना कोरोना संक्रमितसँग सम्पर्कमा आएका ८ जनामा कोरोना भाइरस संक्रमण पुष्टि भएको हो । मंगलबार धरानमा गरिएको पुनः परीक्षणमा ८ जनामा कोरोना देखिएको हो। सोमबार विराटनगरको कोसी अस्पतालको प्रयोगशालामा गरिएको पिसिआर परीक्षणमा ८ जनामा पोजेटिभ देखिएपछि थप परीक्षण गर्न धरान पठाइएको थियो।
संक्रमित आठै जना धरानको वीपी कोइराला स्वास्थ्य विज्ञान प्रतिष्ठानको आइसोलेसनमा छन्। संक्रमित पुष्टि भएका उनीहरुको थप विवरण आउन बाँकी छ ।
यसअघि आजै उदयपुरमा एक ३३ वर्षीय पुरुषमा कोरोना भाइरस संक्रमण पुष्टि भएको थियो । राष्ट्रिय जनस्वास्थ्य प्रशोगशाला टेकुमा गरिएको परीक्षणमा उनीमा कोरोना भाइरस पुष्टि भएको स्वास्थ्य मन्त्रालयका प्रवक्ता डा विकास देवकोटाले जानकारी दिए । योसँगै उदयपुरमामात्रै कोरोना संक्रमितको संख्या २२ जना पुगेको छ । नेपालमा संक्रमित ४ जना निको भएर घर फर्किएका छन्।
