६ जेठ, विराटनगर ।
विराटनगर महानगरपालिका ११ बसपार्कबाट ठूलो परिणामको नक्कली मदिरासहित १ जनालाई पक्राउ गरिएको छ । ती ब्यापारीले कम /दररेटको मदिरालाई महँगो ब्राण्डको बोतलमा रिप्याक गरी विक्री वितरण गर्दै आएको खुलासा समेत भएको छ ।
विराटनगरको बसपार्कको उत्तरतर्फ रहेको न्यु डिएन ट्रेडर्स पसलभित्रै नक्कली मदिरा उत्पादन गर्ने गरिएको खुलासा भएको छ । सो पसलमा नक्कली मदिराको कारोबार भइरहेको सूचना पाएपछि छापा मारेको प्रहरीले पसलभित्रबाट तयार नक्कली मदिराका बोतलहरु सहित मदिरा बनाउन प्रयोग गरिने राजश्वका स्टीकर,गम र कच्चा पदार्थ लगायतका सामाग्रिहरु समेत बरामद गरेको छ । उक्त पसल संचालन गर्दै आएका विराटनगर ६ शान्तिचोकका श्रवण मुखियाले पसल भित्रै र शान्तिचोकमा रहेको आफ्नो घरमा समेत नक्कली मदिरा निर्माण गर्दै आएको प्रमाण फेला परेको छ ।
प्रहरीले उनको घरबाट ६ बोरा बढी सिलप्याक नक्कली मदिरा बरामद गरेको छ भने बसपार्क नजिकको पसलबाट कयौं कार्टुन मदिरा र कच्चा पदार्थ बरामद भएको मोरङ प्रहरीका एसपी विश्व अधिकारीले जानकारी दिए । पसल संचालक मुखियाले प्लास्टिकको बोतलमा बिक्री हुने पासपास ब्राण्डको एकदमै सस्तो मदिरालाई गोल्डेन ओकमा रिफिल गरेर विक्री वितरण गर्दै आएका थिए । यसैगरी कमसल रक्सीलाई ओल्ड दरबार र मास्टर सेलेक्शन लगायतका महँगो मूल्यको बोतलमा रिफिलगरि विक्री वितरण गर्दै आएका थिए ।
पसल संचालक मुखियाले समेत आफुले सस्तो मूल्यको मदिरा महँगो मुल्यको बोतलमा रिफिल गरी विक्री गरेको स्वीकार गरेका छन् । मुखियाले उत्पादन गरेका नक्कली मदिरा अधिकाशरुपमा नजिकै रहेको बसपार्क र होटलहरुमा खपत हुँदै आएको स्थानीयले बताएका छन् । प्रहरीले मुखियाको घर र पसलबाट बरामद भएका नक्कली मदिरासहित मदिरा बनाउने सामाग्रि समेत नियन्त्रणमा लिएको छ ।
नक्कली मदिरा उत्पादन गर्नेलाई राजश्व अनुसन्धान विभागसंग समन्वय गरेर कारवाही चलाईने मोरङ प्रहरीले जनाएको छ । मुखियालाई तत्काल वाणिज्य कार्यालय विराटनगरले ३ लाख जरिवाना भराएको छ । बाँकी अन्य कारवाही आन्तरिक राजस्व कार्यालय विराटनगरले अघि बढाउने वाणिज्य कार्यालय विराटनगरका प्रमुख हिमालय बरालले जानकारी दिए ।
