२१ असार,विराटनगर ।
लक्ष्मिनिया युवा क्लबले दोस्रो वार्षिकोत्सवको अवसरमा आफ्नै क्लबको कार्यालय भवनको उद्घाटन गरेको छ । कार्यक्रमका प्रमुख अतिथि प्रदेश १ का प्रदेश सभा सदस्य जयराम यादवले कार्यालयको उद्घाटन गरेका हुन् ।
मोरङस्थित जहदा–५ मा क्लब स्थापना भएको २ वर्ष पुगेको अवसरमा क्लबको कार्यालय भवनको उद्घाटन गरिएको हो । कार्यक्रमलाई सम्बोधन गर्दै प्रदेशसभा सदस्य यादवले जब सम्म समाजको गतिविधि सुदृढ हुँदैन तबसम्म राजनीतिक, सामाजिक क्षेत्रमा सफलता नहुने बताए । गाउँ, समाज र देशको मेरुदण्डको रूपमा रहेको युवा शक्तिलाई सरकारी, व्यक्तिगत जुनसुकै स्तरबाट साथ दिने प्रतिबद्धता यादवले जनाएका छन् ।
त्यस्तै, कार्यक्रममा बोल्दै जहदा गाउँपालिका ४ का वडाध्यक्ष जयनरथ गिरीले युवाहरूको कामप्रतिको लगाव, इमान्दारितालाई मध्यनजर गरेर आफ्नो पाउने सेवा सुविधाबाट मासिक ५ हजार सहयोग गर्ने प्रतिबद्धता जनाएका छन् ।
त्यस्तै सोही कार्यक्रममा जीवन विकास लघुवित्त संस्था लिमिटेडले उक्त संस्थामा आबद्ध सदस्यका छोरा, छोरीमध्ये एसइईमा उत्कृष्ट अङ्क ल्याउनेहरु दुई जनालाई छात्रवृत्ति वितरण गरेको छ । कार्यक्रममा क्लबले वर्षभरि उत्कृष्ट काम गरेको भन्दै ३ जना सदस्यलाई सम्मान गरेको थियो ।
