४ भदौ, काठमाडौँ ।
काठमाडौंको सीतापाइलामा गएको साउन ८ गते साँझ पवित्रा कार्कीमाथि एसिड आक्रमण गर्ने दुई जना पुर्पक्षका लागि जेल चलान भएका छन् । बिहीबार जिल्ला अदालत काठमाडौंले पीडित २२ वर्षीया कार्कीमाथि एसिड प्रहार गर्ने मोहम्मद आलाम र मुन्ना मोहम्मद दुबै जनालाई पुर्पक्षका लागि जेल चलान गर्न आदेश दिएको हो ।
न्यायाधीश कृष्णजंग शाहको इजलासले उक्त आदेश दिएको हो । राहत कोषबाट पीडितलाई तत्काल दुई लाख क्षतिपूर्ति दिन पनि अदालतले आदेश दिएको छ । उक्त मुद्दामा फैसलाका लागि सुनुवाइ हुन भने बाँकी छ ।
साउन ८ गते साँझ दही किन्न निस्किएकी ओखलढुंगाकी पवित्रा कार्कीमाथि एसिड आक्रमण भएको थियो । उनीमाथि आफ्नै पूर्व मालिक समेत रहेका रौतहट लक्ष्मीपुर घर भई काठमाडौंस्थित डल्लु बस्दै आएका आलामले मोहम्मदलाई एसिड प्रहार गर्न लगाएका थिए ।
एसिड प्रहार गर्ने मुन्ना र आलामलाई प्रहरीले आक्रमण गरे लगत्तै सोही रात पक्राउ गरेको थियो ।
