४ भदाै, काठमाडौ ।
दुई थान पेस्तोल, दुई थान म्यागजिन र १० राउण्ड गोली सहित काठमाडौं नेपालटार शेषमती बस्ने नुवाकोट दुप्चेश्वर गाउँपालिका-७ घर भएका २७ वर्षीय बिकेश पण्डितलाई बुधबार प्रहरीले पक्राउ गरेको छ ।
हातहतियारको ओसारपसार तथा कारोबार हुँदै छ भन्ने विशेष सूचनाको आधारमा महानगरीय अपराध महाशाखाबाट खटिएको प्रहरीले उक्त हतियार सहित फेला पारी उनलाई काठमाडौं महानगरपालिका-१६ माछापोखरीबाट पक्राउ गरेको हो ।
थप अनुसन्धानको क्रममा पण्डितलाई उक्त हतियार ओसारपसार गर्न लगाउने नुवाकोट लिपु गाउँपालिका-१ बस्ने २८ वर्षीय अमर सिंह तामाङ घलेलाई जिल्ला प्रहरी कार्यालय नुवाकोटसँगको समन्वयमा उक्त महाशाखाबाट खटिएको प्रहरीले उनकै घरबाट पक्राउ गरेको छ ।
घले डाँका मुद्दामा ६ वर्ष २ महिना कैद सजाय भुक्तान गरी २०७६ फागुन १२ गते थुना मुक्त भएका थिए। कारागारमा रहेका बेला उक्त हतियारको बारेमा लागूऔषध मुद्दामा सजाय भोगी रहेका धादिङ खाल्टे घर भएका राजकुमार गुरुङले बालाजु एरियामा लुकाई छिपाई राखेको हतियार अपराधिक मनसायले बोक्ने तथा ओसारपसार गरेको प्रारम्भिक अनुसन्धानबाट खुल्न आएको उक्त महाशाखाले जनाएको छ ।
उनीहरुलाई आवश्यक कारवाहीको लागि महानगरीय प्रहरी परिसर टेकु काठमाडौं पठाइएको उक्त महाशाखाले जनाएको छ ।
