नितेश यादव
१५ भदौ, जनकपुरधाम ।
कोरोना संक्रमणको जोखिम दिन प्रतिदिन बढ्दै गएकोले महोत्तरीमा जारी निषेधाज्ञालाई एक साता लम्ब्याउने निर्णय भएको छ । जिल्ला प्रशासन कार्यालय महोत्तरीले यसअघि जारी गरिएको निषेधाज्ञाको समय आज सोमबार राति १२ बजे समाप्त हुने भएकोले भदौ २२ गते राति १२ बजे सम्मको लागि निषेधाज्ञा समयावधि पुनःथप गरेको छ ।
कोरोना संक्रमणको रोकथाम तथा नियन्त्रणका लागि स्थानीय प्रशासन ऐन, २०२८ को दफा ६९३० बमोजिम जिल्लाभर निषेधाज्ञा जारी गरेको महोत्तरीका प्रमुख जिल्ला अधिकारी कृष्णबहादुर कटुवालले जानकारी दिए । सोमबार राति १२ बजेदेखि लागू हुने निषेधाज्ञाको अवधिमा अत्यावश्यक पसलहरु बिहान ५ बजे देखि ११ बजेसम्म खोल्न पाइने कटुवालले बताए ।
प्रशासनले यस निषेधाज्ञाको अवज्ञा गर्नेलाई स्थानीय प्रशासन ऐन २०२८ तथा संक्रामक रोग ऐन २०२० बमोजिम कारवाही गर्ने समेत बताइएको छ । महोत्तरीमा अहिलेसम्म १ हजार २ सय ३६ जनामा कोरोना संक्रमण पुष्टि भएको छ भने कोरोना संक्रमणबाट ८ जनाको मृत्यु भएको छ ।
