२९ भदौ, दोहा ।
कोरोना भाइरसका कारण कतारबाट स्वदेश फकर्ने नेपालीहरुको संख्या उल्लेखीय रहेपछि नेपाल एयरलाइन्सले कतारबाट काठमाडौंका लागि हुने उडान थप गरेको छ । कतारबाट स्वदेश फर्कन विभिन्न माध्यमबाट कतारस्थित नेपाली दूतावासमा नाम दर्ता गराएका नेपालीहरुका लागि नेपाल एयरलाइन्सले थप ६ उडान थप गर्ने निर्णय गरेको हो ।
दूतावासले सार्वजनिक गरेको उडान तालिका अनुसार सेप्टेम्बर १५, १६ र १७को लागि यस अघि नामप्रकाशित भई विभिन्न कारणले टिकट काट्न छुटेका व्यक्तिहरुले टिकट लिईसकेको समेत जनाएको छ । यस्तै, सेप्टेम्बर २२, २४ र २५ कालगि तय भएका उडानहरुका लागि १५ सेप्टेम्बरबाट मात्र टिकटका लगि सम्पर्क गर्न दूतावासले अनुरोध गरेको छ । उक्त उडानका लागि प्राथमिकतामा परेका यात्रुहरुको नामावली पनि सार्वजनिक गरेको छ ।
स्वदेश फर्किने यात्रुहरुले नेपाल सरकारको निर्णय बमोजिम पीसीआर परीक्षण गरी ७२ घण्टा भित्रको कोभिड १९ नेगेटिभ सर्टिफिकेटको सक्कल प्रमाण साथमा राख्नु पर्ने दूतावासले जनाएको छ । पीसीआर परीक्षण नगरी जान चाहनेहरुको हकमा आफ्नै खर्चमा ७ दिनको होटल क्वारेन्टिनमा बस्नु पर्ने र पिसिआर परीक्षण गरेका र नगरेका यात्रुहरु एउटै उडानमा यात्रा गर्न नपाईने व्यवस्था रहेको जनाएको छ । होटल क्वारेन्टिनको खर्च टिकट काट्ने बेलामा लिने र होटललाई भुक्तानीगर्ने कार्य सम्बन्धित एयरलाईन्सले नै गर्नेछ ।
पीसीआर परीक्षण गर्नका लागि कतारका सरकारी स्वास्थ्य केन्द्र वा कतार सरकारबाट अनुमति प्राप्त प्राईभेट अस्पतालहरुमा सम्पर्क राख्न सकिने दूतावासले जनाएको छ । हवाई भाडा पूर्व सूचनामा उल्लेख भए बमोजिम कतारी रियाल १४ सय ३० लाग्नेछ ।
साथै दूतावासको प्राथमिकता सूचीमा नाम पर्न वा हवाईटिकट खरिद गर्न थप शुल्क रकम बुझाउनु परेको केही गुनासाहरु प्राप्त भएको भन्दै यस प्रकारको कुनै शुल्क तिर्नु नपर्ने दूतावासले जनाएको छ । कसैले यस प्रकारको शुल्क वा रकम असुल गरेको पुष्टि भएमा कानून वमोजिम कारवाही गरिने चेतावनी समेत दूतावासले जनाएको छ ।
