आइसोलेसनमा १८ घण्टासम्म खाना र पानी नपाएपछि नाराबाजी

0SHARES

८ असार २०७७ नेपाल टाईम्स

८ असार, सिरहा ।

सिरहामा आइसोलेसनमा राखेको १८ घण्टासम्म खाना र पानी नदिएको भन्दै संक्रमितले सोमबार नाराबाजी गरेका छन् ।

सदरमुकामको चन्द्र माध्यमिक विद्यालयमा स्थापना गरिएको आइसोलेसनमा बसेका ७० जनालाई १८ घण्टापछि मात्र खाना दिएपछि आक्रोसित भएका उनीहरूले नाराबाजी गरेका हुन् । बिहान नास्ता र पिउने पानी व्यवस्थापन पक्षले नदिएपछि उनीहरुले नाराबाजी गरेका थिए ।

खाना नपाएपछि आफन्तलाई फोन गरेर घरबाटै खाजा मगाउने गरेको उनीहरूले बताएका छन् । पिउने पानी, खाजा र खाना समयमा दिन माग राख्दा व्यवस्थापन पक्षले कुनै वास्ता नगरेको आइसोलेसनमा बसेका एक जनाले बताए । आइतबार साँझ ६ बजे आइसोलेसनमा लगिएका संक्रमितहरुलाई आज (सोमबार) साढे १० बजेपछि मात्रै खाना दिइएको थियो ।

रातिदेखिनै पिउने पानी नपाएको उनीहरूले गुनासो गरे । विहान पनि समयमा खाजा र पानी नपाएपछि उनीहरू नाराबाजीमा उत्रिएका थिए । ‘तीन पटक खाने औषधी थमाइएको छ,’ एक संक्रमितले भने, ‘तर पिउने पानी र खाजा समयमा नपाउँदा औषधी खान पाइएको छैन् ।’

संक्रमितलाई सिटामोल, डक्सिसाइक्लिन, भिटामिन बि कम्पलेक्स, डाइजिन(एन्टासिड) लगायतका औषधी दिइएको छ । ती औषधी सेवन गर्न आवश्यक पर्ने खाना, खाजा र पानी आवश्यक भने छैन् । कतिपयले आइसोलेसनको बाहिरबाट पानी, खाजा, फलफूलहरु मगाउने गरेको बताए ।

समुदायमा संक्रमण नफैलियोस भन्दै आइसोलेसनमा राखिए पनि सुरक्षा भने निकै फितलो छ । सदरमुकामको बीच बजरमा रहेको आइसोलेसनमा समयमा खाजा, पानी र खाना उपलब्ध नहुँदा आफन्तले पुर्याउने क्रममा संक्रमण फैलिन सक्ने जोखिम बढेको स्थानीयहरुले बताएका छन् ।

उक्त आइसोलेसनको जिम्मा जिल्ला अस्पताल सिरहालाई दिइएको छ । जिल्ला अस्पताल प्रमुख डा. नागेन्द्रप्रसाद यादवले दुई पटक खाना खुवाउने टेण्डर भएकोले त्यसैअनुसार खुवाउने गरेको बताए । ‘खाना खुवाउने कुनै सेड्यूल छैन,’ डा यादवले भने, ‘विहान र बेलुका खाना दिने गरिएको छ ।

अरु समयमा मिले अनुसार खाजाको व्यवस्था हुन्छ ।’

विज्ञापन बक्स