इटालियन सुपर कप : रोनाल्डोको गोलमा युभेन्टसलाई उपाधि

0SHARES

३ माघ २०७५ नेपाल टाईम्स

एजेन्सी, माघ ३
युभेन्टसले एसी मिलानलाई १–० ले पराजित गर्दै इटालियन सुपर कपको उपाधि जितेको छ । स्टार फरवार्ड क्रिस्टियानो रोनाल्डोले निर्णायक गोल गरेपछि युभेन्टसले उपाधि जित्न सफल भएको हो ।

साउदी अरेबियामा भएको खेलमा रोनाल्डोले खेलको ६१ औं मिनेटमा गरेको हेडर गोल नै युभेन्टसलाई उपाधि दिलाउन पर्याप्त रहयो । उनले मिरालेम प्यानिचको पासमा गोल गर्दै युभेन्टसलाई उपाधिसम्म ल्याएका थिए ।

यसै सिजनको सुरुवातमा रियल म्याड्रिड छाडेर युभेन्टस आएका रोनाल्डोले आफ्नो उच्च फर्मलाई बुधबार पनि कायमै राखे । खेलको अन्तिम १५ मिनेट मिलान टोली १० खेलाडीमा समेटिएको थियो । फ्रान्क केसीले युभेका एम्रे च्यानमाथि ट्याकल गरेपछि रेफ्रीले रातो कार्ड दिएका थिए ।

पछिल्लो दुई सिजन फाइनलमा पराजित भएको युभेन्टसले बुधबार भने उपाधि जित्न सफल रह्यो । यस पटकको उपाधि जितेसँग युभेन्टसले सर्वाधिक ८ पटक जितेको कीर्तिमान कायम गरेको छ । एसी मिलानले पनि सात पटक उपाधि हात पारेको छ ।

विज्ञापन बक्स