उत्तरी नाइजेरियामा भीषण सैनिक अपरेशन

0SHARES

२५ जेष्ठ २०७७ नेपाल टाईम्स

२५ जेठ, अबुजा।

नाइजेरियाको उत्तरपश्चिम कडुना राज्यमा जारी भीषण सैन्य कारबाहीमा कम्तीमा ७० जना बन्दुकधारी मारिएका सैनिक प्रवक्ताले बताएका छन् । सेना प्रवक्ता जोन एनिचेले डाकु समूहमा आबद्ध हतियारधारीहरू लुकेर बसेको कासिया जङ्गलमा सेनाले गरेको कारबाहीमा ती व्यक्ति मारिएको बताए ।

कडुनाको ठूलो क्षेत्रमा बन्दुकधारीहरूले स्थानीय गाउँलेको सम्पत्ति र गाईवस्तु लुटपाट गर्नुका साथै प्रतिरोध गर्ने स्थानीयवासीको हत्या गर्ने गरेका छन् । लगातार त्रासको वातावरण सिर्जना गरेको भन्दै नाइजेरियाली सेनाले सो क्षेत्रमा अहिले अपरेशन एकर्ड नामको सैनिक अभियान सञ्चालन गरेको छ । सेनाले पैदल सहित हेलिकप्टरबाट बन्धुकधारीहरू लुकेका स्थानमा कारबाही गरेको प्रवक्ताले जानकारी दिए ।

कारबाहीमा अरु धेरै घाइते व्यक्ति फरार भएको पनि सेनाको भनाई छ । सेनाले अझै पनि जङ्गल क्षेत्रमा कारबाही जारी राखेको जनाएको छ ।
एक साताअघि नाइजेरियाका राष्ट्रपति मुहम्मदु बुहारीले कुडुना क्षेत्रमा सक्रिय बन्दुकधारीलाई पूर्ण रुपमा निर्मूल गर्नेगरी सैन्य कारबाही तीव्र बनाउन आदेश दिनुभएको थियो ।

विज्ञापन बक्स