ए डिभिजन लिगः फ्रेण्ड्स पहिलो जितको खोजिमा रहँदा सरस्वती रेलिगेशनबाट माथि उठ्ने प्रयासमा

0SHARES

२७ पुष २०७६ नेपाल टाईम्स

२७ पौष, काठमाडौं । कतार एअरवेज शहीद स्मारक ए डिभिजन लिग फुटबलअन्तर्गत आइतबार दुई वटा खेल हुँदैछन् ।

त्रिपुरेश्वरको दशरथ रङ्गशालामा मध्यान्ह १२ बजे थ्रीस्टार र फ्रेण्ड्स क्लब प्रतिस्पर्धा गर्दैछन् । थ्रीस्टार १० अङ्कसहित तालिकाको चौथो स्थानमा छ । फ्रेण्ड्स क्लबले भने जारी लिगमा अहिलेसम्म २ अङ्कमात्रै जोडेको छ ।

फ्रेण्ड्स क्लब अहिले अङ्क तालिकाको १३ औँ स्थानमा छ । आजको खेलमा फ्रेण्ड्स क्लब पहिलो जितको खोजिमा हुनेछ । त्यस्तै तीन खेलमा जित र एक खेलमा बराबरी खेलेको थ्रीस्टार आजको खेलमा विजयी भए शीर्ष स्थानको मछिन्द्रसँग अङ्क बराबरी गर्ने छ । तर थ्रीस्टार गोल अन्तरका आधारमा दोस्रो स्थानमा रहने छ ।

यस्तै दिउँसो तीन बजे आठौँ स्थानको ब्रिगेड ब्वाइज र पुछारमा रहेको सरस्वती क्लब प्रतिस्पर्धा गर्दैछन् । ब्रिगेड ब्वाइज विजयी भए छैटौँ स्थानमा उक्लने छ भने सरस्वती विजयी भए रेलिगेशन जोनबाट माथि उठ्ने प्रयासमा हुनेछ ।

शनिबार भएको खेलमा मछिन्द्रले जावलाखेलमाथि एक–शून्यको जित दर्ता गर्दा मनाङले हिमालयन शेर्पासँग गोलरहित बराबरी खेलेको थियो ।

विज्ञापन बक्स